Alaksandar Kazulin ź cieščaj i dačkoj Julijaj, na pachavańnia ciaścia.
Siońnia z kalonii Vićba-3 na svabodu vyjšaŭ Alaksandar Kazulin.
Jon adbyvaŭ 5,5-hadovy termin turemnaha źniavoleńnia, nibyta za chulihanstva, paśla taho jak kinuŭ vyklik Alaksandru Łukašenku na prezydenckich vybarach.
Jak stała viadoma, jaho pamiłavali specyjalnym ukazam A. Łukašenki, jaki byŭ padpisany ŭ piatnicu.
Jak paviedamiŭ brat Kazulina Ŭładzimier, u piatnicu ž pamior Kazulinaŭ cieść. U subotu ŭranku Kazulina vyklikali ŭ administracyju kalonii, dzie jamu pra heta paviedamili i pakazali padpisany A.Łukašenkam ukaz ab pamiłavańni. Ale Kazulin zhody na pamiłavańnie nie padpisaŭ. Pamiłavańnia jon pryznavać nie źbirajecca, bo tym samym musiŭ by pryznać i svaju vinu. Tady jaho adpuścili prosta tak, biaz podpisu - na pachavańnie ciaścia, Nia vyklučana, što paśla pachavańnia budzie prasicca nazad u kaloniju, adznačyŭ U. Kazulin.
Rodnyja A. Kazulina spadziajucca na toje, što sprava skončycca ŭ lubym razie kančatkovym vyzvaleńniem. Spadzievy na jaho byli źviazanyja z kuluarnymi pieramovami miž pasłom Niamieččyny i Administracyjaj Łukašenki, što praciahvalisia na minułym tydni. Chodziać čutki, što ŭ svaim handli z Zachadam łukašenkaŭcy byli hatovyja vyzvalić hrupu palitviaźniaŭ uzamien na niejkija vyhady.
Vyzvaleńnie palitviaźniaŭ, u tym liku Kazulina, - heta adno z asnoŭnych patrabavańniaŭ Abjadnanych demakratyčnych siłaŭ, Eŭrasajuzu i ZŠA. U časie minułaha vyzvaleńnia palitviaźniaŭ, uzimku, adpuścili ŭsich, akramia Kazulina.
Na pytańnie, čamu, na dumku siamji vyzvaleńnie palitviaźnia numar adzin adbyłosia mienavita ciapier, Uładzimier Kazulin adkazaŭ: «Chadžeńni pasłoŭ u Administracyju prezydenta pačalisia dosyć daŭno...»
Časovy pavierany ŭ spravach ZŠA ŭ Biełarusi Džonatan Mur vitaŭ vyzvaleńnie Kazulina jak «pieršy važny krok z boku biełaruskich uładaŭ».
Pasoł Niamieččyny byŭ siońnia niedasiažny dla kamentaroŭ. Zvykłaje maŭčańnie zachavała i presavaja słužba A. Łukašenki.
Ciaścia Kazulina zvali Ivan Sabaleŭski. Chavać jaho buduć u Kojdanavie (Dziaržynsku). Jon nie pieranios straty dački... Chavali jaho ŭ niadzielu ŭranku.
U subotu stali viadomymi kamentary jurystaŭ: dla vyrašeńnia pytańnia ab pamiłavańni pryznańnie źniavolenym svajoj viny nie źjaŭlajecca abaviazkovaj umovaj.
