13 červienia sud Vietkaŭskaha rajona praciahnuŭ razhlad rezanansnaj kryminalnaj spravy, abvinavačvanyja pa jakoj — byłyja supracoŭniki Śledčaha kamiteta i milicyi. Były śledčy, pa viersii jaho kaleh, zajmaŭsia vymahalnictvam, «pastaviŭ na ličylnik» dvuch pradprymalnikaŭ, biŭ abodvuch pa tvary, złamaŭšy adnamu kostku nad skivicaj. Takija dziejańni śledstva rascaniła jak vymahalnictva (častka 3 artykułu 208 Kryminalnaha kodeksu). Tavaryš abvinavačvanaha, jaki na momant mahčymaha złačynstva pracavaŭ opierupaŭnavažanym kryminalnaha vyšuku Čyhunačnaha RAUS Homiela, abvinavačvajecca ŭ biaździejańni słužbovaj asoby (častka 2 artykuła 425 KK). Jaho vinavaciać u tym, što jon «stajaŭ pobač» — bačyŭ, jak śledčy parušaje zakon i «vybivaje hrošy» z pradprymalnikaŭ, ale nie praduchiliŭ i nie spyniŭ takija dziejańni. «Biaździejańnie ŭ formie paturańnia», — udakładniŭ prakuror abvinavačańnie.
Kanflikt adbyŭsia letaś, 16 červienia 2016 hoda. Sud ciahniecca z poźniaj vosieni 2016 hoda. Były śledčy, jaki «padpisaŭsia» za pradprymalnikaŭ, Alaksandr — pad vartaj. Były milicyjanier Siarhiej nie aryštavany.
Razborki homielskich u Vietcy
Usie ŭdzielniki kanfliktu — homielskija, ale jak razborki adbylisia ŭ Vietcy, to sud adbyvajecca ŭ rajcentry. Tut drobnaja firma mieła vytvorčyja pamiaškańni. Inšaje pryvatnaje pradpryjemstva zamoviła ŭ pradprymalnikaŭ dva transparciory. Zamova nie była vykananaja ŭ čas, terminy zaciahvalisia. Pryvatnaje pradpryjemstva čakała transparciory. Urešcie adzin z pradstaŭnikoŭ kampanii pryciahnuŭ da spravy supracoŭnika Śledčaha kamiteta Alaksandra z metaj prymusić pradprymalnikaŭ vykanać zamovu. U vytvorčaje pamiaškańnie śledčy pryjazdžaŭ dva razy — 10 i 16 červienia 2016 hodua. Pa viersii śledstva i paciarpiełych, 10 červienia śledčy pahražaŭ «žyćciu i zdaroŭju» pradprymalnikaŭ, «pastaviŭ ich na ličylnik» — 100 dalaraŭ za dzień. Razam ź im byŭ milicyjanier, jaki aktyŭnych dziejańniaŭ nie vykonvaŭ, ruki nie raspuskaŭ, a ciapier vinavacicca ŭ biaździejańni.
Pradstaŭnik firmy, što zamaŭlała transparciory, tłumačyŭ na sudzie, što źviarnuŭsia da supracoŭnika Śledčaha kamiteta pa dapamohu, bo «jon bolš pravilna ŭmieje razmaŭlać ź ludźmi i moža pastavić na miesca». «Jon moh by zrabić, kab chutčej prasoŭvałasia praca, rastłumačyć ludziam, što treba rabić pravilna», — kazaŭ śviedka na sudzie.
Pradprymalniki abiacali vykanać zamovu, ale praz tydzień, 16 červienia, transparciory nie byli zroblenyja, i tady śledčy nakinuŭsia na paciarpiełych z kułakami, złamaŭ adnamu kostku nad skivicaj. «Jon nam pahražaŭ, kryčaŭ, što kali nie vykanajem zamovu, to pryjedzie bryhada, nas pałomiać i zakapajuć», — kazali na sudzie pradprymalniki. Pa ich słovach, supracoŭnik SK kidaŭ na ich mietaličnaje naždačnaje pałatno, dy pramachnuŭsia.
Jany spałochalisia i pajšli pisać zajavu ŭ Vośmaje upraŭleńnie Hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj.
Na sudzie 13 červienia adzin z paciarpiełych adznačyŭ, što i pradprymalniki, i milicyjaniery — «usie byli zaadno, usie byli zacikaŭlenyja, kab zabrać u nas transparciory i nie zapłacić hrošy, pryjazdžali i inšyja milicyjaniery da nas, jakija nie pry spravach».
Adzin sa śviedkaŭ — pradstaŭnik kampanii, što zamaŭlała transparciory, daŭ pakazańni na sudzie, što sapraŭdy śledčy stuknuŭ pradprymalnika, ale nie pa tvary, a pa karku, i heta nie było źbićcio, a była «pavučalnaja aplavucha». Hetym terminam potym apraŭdvała dziejańni svajho padabaronnaha i advakat.
Ni śledčy, ni milicyjanier vinavatymi siabie nie pryznali.
Śledčy: «Ja navodziŭ paradak. Tak mnie padkazała majo sumleńnie»
Milicyjanier Siarhiej kaža na sudzie, što ŭ toj dzień, 16 červienia, jon damoviŭsia z pryjacielem sa Śledčaha kamitetu papić piva. Toj abiacaŭ, ale paprasiŭ pierad hetym razam ź im źjeździć u Vietku. Dla čaho — śledčy nie ŭdakładniaŭ, a milicyjanier nie cikaviŭsia. «Ja ŭnutr boksaŭ nie zachodziŭ, stajaŭ niepadaloku, čakaŭ jaho. Čuŭ, što była hučnaja razmova, niejkaja sprečka, ale nie ŭmiešvaŭsia», — paciskaŭ plačyma były milicyjanier.
Na sudzie śviedki i paciarpiełyja dali pakazańni, što ŭsio-taki jon umiešvaŭsia, kali kazaŭ u čas kanfliktu na pradprymalnikaŭ: «Čaho vy staicie? Idzicie pracujcie, što vam nie zrazumieła jašče?». Advakat byłoha opierupaŭnavažanaha paličyŭ takija słovy nie ciskam na pradprymalnikaŭ, a naadvarot — sprobaj ułahodzić kanflikt.
Były śledčy pakazaŭ na sudzie, što jaho pryjaciel, jaki pracuje ŭ pryvatnaj firmie, paprasiŭ jaho źjeździć razam u Vietku. Tam, na vytvorčaj placoŭcy, jon staŭ śviedkam kanfliktu pamiž dvuma subjektami haspadarańnia, adzin ź jakich nie vykanaŭ abiacańni, zaciahvaŭ terminy. «I nastupny raz, kali my pryjechali ŭ Vietku, to pačuli adny abiacanki — transparciory nie byli zroblenyja, a vykanaŭca ŭvodziŭ u zman. Ja aburyŭsia, i skazaŭ, kab Siarhiej (paciarpieły — Red.) pavodzić siabie niapravilna, i chaj za heta prysiadaje, dziesiać razoŭ… Ja jeździŭ tudy, bo paprasiŭ siabar. Ciapier ja razumieju, što nie varta było ŭmiešvacca. Ja nie kazaŭ pra sto dalaraŭ praterminoŭki. Pakazańni paciarpiełych liču niesapraŭdnymi. Mahčyma, hetaja sprava — śledstva varožaści pamiž HUBAZiK i SK, jakaja isnuje z-za pavyšeńnia pakazčykaŭ pa słužbie», — vykazaŭsia Alaksandr. Jon dadaŭ, što stuknuŭ pradprymalnika — bo nie strymaŭsia, asabliva paśla taho, jak toj užyŭ «… tvaju maci!». «Mianie aburała, što ludzi nie pracavali, a tolki abiacali. Ja nie pavinien byŭ zastavacca ŭbaku. Ja heta zrabiŭ nie dziela hrošaj, a kab navieści paradak. Jany ž abiacali, klalisia, ździekavalisia nad zakazčykami. Sumleńnie dało mnie paŭnamoctvy navieści paradak», — patłumačyŭ abvinavačvany.
Paciarpiełyja nazvali ŭ sudzie byłych pravaachoŭnikaŭ «sapraŭdnymi piarevaratniami ŭ pahonach». «Usia hetaja kampanija pryjazdžała nas bić i vybivać hrošy…My byli ŭpeŭnienyja, što nas zabjuć, jany nas mocna napałochali», — kazali paciarpiełyja.
Advakaty: «Jany nie vinavatyja!»
Advakat byłoha śledčaha padvierhła sumnievam jak pakazańni paciarpiełych, tak i zaklučeńnie ekśpiertaŭ. «Na sudzie adznačyli, što niama pryčyn dla nahavoraŭ, ale chto daśledavaŭ, što sapraŭdy niama takich pryčynaŭ? Zaklučeńnie ekśpierta składzienaje z parušeńniem praviłaŭ. Pakazańni paciarpiełych, śviedak ź ich boku sud prymaje da ŭvahi, a abvinavačanych — nie. Choć śviedki, naprykład, rabočyja — padnačalenyja paciarpiełych, a ich žonki — taksama zacikaŭlenyja asoby. Tak, moj padabaronny stuknuŭ paciarpiełaha, ale toj parušyŭ abiacańni, jakija davaŭ, i paciarpieły nie mieŭ racyi, voś moj padabaronny i nie vytrymaŭ, i heta sapraŭdy była, jak tut kazali, pavučalnaja aplavucha», — patłumačyła advakat, i prasiła apraŭdać byłoha śledčaha, bo abvinavačańnie nie znajšło svajho paćviardžeńnia ŭ sudzie.
Takoj ža pazicyi prytrymlivaŭsia i advakat byłoha milicyjaniera. «Kab zrazumieć abjektyŭnaje ŭspryniaćcie situacyi maim padabaronnym, treba zmadelavać situacyju… Moj padabaronny pieršy raz byŭ na vytvorčaj placoŭcy ŭ Vietcy, jon čuŭ razmovu pra niejkija nie vykananyja abaviazacielstvy, pra pieniu, pra praterminoŭku… A toje, što jon skazaŭ paciarpiełym «Čaho staicie, idzicie i pracujcie» — heta jon skazaŭ, kab spynić kanflikt, bo čuŭ, što hradus razmovy padvyšajecca, što Alaksandr niervujecca. Skazaŭ heta, kab sprečka nie pierarasła ŭ niešta bolšaje. Jon zrabiŭ usio, kab praduchilić pravaparušeńnie. I majo mierkavańnie, što moj padabaronny tut tolki dla taho, kab uzmacnić rezanans», — ličyć advakat.
Jon dadaŭ, što choć spravu i rasśledavaŭ Centralny aparat SK, ale «horšaj spravy ja jašče nie bačyŭ za apošnija hady, sapraŭdy, nie vyśvietlili elemientarnyja pytańni, nie vyklučyli supraćlehłaści… heta nie prosta niedapracoŭka, a sistemnaja pamyłka».
Byłomu śledčamu pradstavili mahčymaść apošniaha słova. «Ja prysutničaŭ na sudzie… Ja nie dumaju, što ja sapraŭdy vinavaty… Niama słovaŭ. Niama słovaŭ. Dziakuj za pracu ŭsim, vialiki dziakuj», — Alaksandr byŭ łakaničny i źbiantežany.
«Prašu pakarać pazbaŭleńniem voli, 8 hadoŭ z kanfiskacyjaj»
Pradstaŭnik prakuratury Vietkaŭskaha rajona vykazaŭsia, što abvinavačańnie znajšło svajo paćvierdžańnie ŭ sudzie — jak u dačynieńni da byłoha śledčaha, tak i milicyjaniera. Namieśnik prakurora rajona zaŭvažyŭ, što abodva svaimi dziejańniami dyskredytavali pravaachoŭnyja orhany, parušyli prysiahu, akazali niehatyŭny ŭpłyŭ na farmavańnie pazityŭnaha imidžu orhanaŭ. Raniej jany nie byli sudzimyja, majuć stanoŭčyja charaktarystyki, adzin — małaletniaje dzicia — heta plus, i źmiakčaje vinu, ale ciažkaje złačynstva (vymahalnictva), i dyskredytacyja orhanaŭ — minus, i robić vinu bolš ciažkaj.
Takim čynam prakuratura prasiła sud pakarać byłoha śledčaha pazbaŭleńniem voli terminam na vosiem hadoŭ, kanfiskavać majomaść, pazbavić jaho zvańnia «major justycyi». Byłoha milicyjaniera abvinavačańnie paprasiła pakarać štrafam u pamiery 400 bazavych, i zabaranić jamu terminam na piać hadoŭ zajmać pasady, źviazanyja z funkcyjami pradstaŭnika ŭłady.
Prysud miarkujecca abviaścić 26 červienia.
