Indyjskaja palicyja zatrymała 60-hadovaha mužčynu, jaki zabiŭ svaju žonku za toje, što taja svoječasova nie nakarmiła jaho viačeraj, paviedamlaje VVS.
Pavodle danych palicyi, viečaram u subotu Ašok Kumar viarnuŭsia dadomu pjanym i pasvaryŭsia sa svajoj žonkaj, 55-hadovaj Sunainaj.
«Jon piŭ kožny dzień. U subotu jon znoŭ pryjšoŭ dadomu pjanym i pačaŭ łajacca z žonkaj. Jana była niezadavolenaja jaho pjanstvam i chacieła pahavaryć pra heta. Ale jon patrabavaŭ nieadkładna prynieści viačeru», — raspavioŭ pradstaŭnik palicyi horada Haziabad Rupieš Sinhch.
Pa słovach pradstaŭnika palicyi, mužčyna razzłavaŭsia z-za taho, što žonka nie niesła ježu, i streliŭ joj u hałavu. Sunainu dastavili ŭ balnicu, ale vyratavać jaje nie zdoleli.
Ašok Kumar daŭ pryznalnyja pakazańni, dadaŭšy, što škaduje pra ŭčynienaje.
Voś užo bolš za 10 hadoŭ chatni hvałt źjaŭlajecca ŭ Indyi samym raspaŭsiudžanym złačynstvam u dačynieńni da žančyn.
Pavodle aficyjnaj statystyki, u 2015 hodzie paviedamleńnie ab čarhovym vypadku chatniaha hvałtu pastupała ŭ palicyju Indyi ŭ siarednim kožnyja čatyry chviliny. Značnaja častka hetych złačynstvaŭ była źviazanaja z roznahałośsiami nakont pasahu žonki abo niaviesty i prava rasparadžacca hetym pasaham.
Chatni hvałt u dačynieńni da žančyn nie źjaŭlajecca vyklučna indyjskaj prablemaj, adnak mienavita ŭ Indyi padobnyja vypadki vielmi časta zamoŭčvajucca. Adnoj z pryčyn hetaha maŭčańnia źjaŭlajecca ŭjaŭleńnie ab tym, što ŭ peŭnych vypadkach muž «maje prava» pabić žonku.
Zhodna z vynikami apytańnia, jakoje pravodziłasia na zamovu ŭrada, bolš za 54% mužčyn i 51% žančyn u Indyi ličać narmalnym, kali muž bje žonku za prajaŭlenuju niepavahu da jaho baćkoŭ abo za toje, što žonka hrebuje svaimi abaviazkami pa chacie ci drenna kłapocicca pra dziaciej.
Niekatoryja apytanyja navat zajavili, što muž maje prava pabić žonku, kali jana niedasolić abo pierasolić stravu.
