«Admiena ŭkaza № 585 była zaŭčasnaj, heta była surjoznaja pamyłka», — skazaŭ siońnia na sustrečy z žurnalistami ministr architektury i budaŭnictva Anatol Čorny, pajevdamlaje tut.by.
— Admiena 585-ha ŭkaza nie mieła sensu z 6 žniŭnia, termin, jaki my paznačyli ŭ novym dakumiencie. My nie zmahli praduhledzieć, što peŭnaja katehoryja ludziej, jakaja vybudoŭvała svaje biudžety na budaŭnictva žylla, stukniecca ŭ skału nierazumieńnia. Treba pryznać, što heta surjoznaja pamyłka i my prynosim svaje prabačeńni. Siońnia padrychtavany moj zvarot da kiraŭnika dziaržavy padoŭžyć dziejańnie 585-ha ŭkaza na pieryjad zaviaršeńnia budaŭnictva damoŭ, pačatych budaŭnictvam da pryniaćcia 240-ha ŭkaza, — raspavioŭ Anatol Čorny.
Ministr adznačyŭ, što padoŭžana dziejańnie 585-ha ŭkaza budzie nie bolš čym da 1 kvartała 2018 hoda — za hety čas usie damy, u jakich budavalisia siemji, jakija pretendujuć na subsidyi pa hetym ukazie, buduć uviedzieny ŭ ekspłuatacyju.
Srodki na subsidavańnie hramadzian pa 585-m ukazie adšukać mahčyma, udakładniŭ ministr: «Prablema vyrašalnaja, ja dumaju, kiraŭnik dziaržavy padtrymaje maju prośbu pa praciah terminu dziejańnia 585-ha ŭkaza».
Nahadajem, na minułym tydni prezident padpisaŭ novy ŭkaz №240 ab adrasnych subsidyjach na žyllo, jaki pačnie dziejničać z 6 žniŭnia. Akazałasia, što razam ź im stracić siłu inšy ŭkaz — ab dapamozie maładym i šmatdzietnym siemjam pry budaŭnictvie žylla №585.
Maładyja i šmatdzietnyja siemji, jakija raźličvali na subsidyju pa 585-m ukazie i jakija ŭziali kamiercyjnyja kredyty pad 19—20%, trapili ŭ pravavuju jamu — kali da žniŭnia ich damy nie zdaduć, to pa 585-m im užo subsidyi nie naležać, a pa 240-m — jašče nie naležyć (pa im subsidujuć u paradku čarhovaści). Siemji, jakija ŭstupili ŭ budaŭnictva ŭ 2016—2017 hadach mahli b zastacca ź vializnymi vypłatami pa kredytach, jakija b uziać nie ryzyknuli, kali b nie nadzieja na dziaržavu. Subsidyi pa 585-m ukazie naležali tolki tym, chto braŭ kamiercyjnyja kredyty na žyllo.
