U ziamielny sud niamieckaha horada Inhalštata pa rasparadžeńni sudździ była dastaŭlenaja kotka, jakaja pakusała susiedku jaje haspadyni. Praŭda, pakazańniaŭ joj davać nie daviałosia. Sudździa chacieła tolki asabista pierakanacca ŭ tym, nakolki žyvioła ahresiŭnaja, paviedamlaje DW.
U pazoŭnaj zajavie paciarpiełaj paviedamlałasia ab tym, što susiedskaja kotka nakinułasia na jaje i ŭkusiła za pravuju nahu ŭ čas viačerniaj prahułki. Z-za taho, što rana zapaliłasia, lačeńnie zaciahnułasia. Akramia taho, na nazie zastaŭsia šnar. Paciarpiełaja zapatrabavała praz sud apłatu miedycynskich pasłuh i kampiensacyju za pryčynienuju maralnuju i fizičnuju škodu —ahułam amal 2700 jeŭra.
Adkazčyca ž nastojvała na tym, što kotka ŭ jaje zusim nie złosnaja, a miłaja i puchnataja, nie kusajecca, nie drapajecca, dy i muchi nie pakryŭdzić, nie toje, kab ukusić.
Sudździa zrabiła vyklučeńnie
Niahledziačy na toje, što chatnim žyviołam uvachod u budynki niamieckich sudoŭ stroha zabaronieny, sudździa Chajkie Linc-Chionie vyrašyła, jak paviedamlaje hazeta Passauer Neue Presse, zrabić vyklučeńnie, i dała zahad dastavić na čarhovaje pasiadžeńnie suda vinavatuju ŭ zdareńni. Zrazumieła, u śpiecyjalnaj kletcy dla transparciroŭki chatnich žyvioł.
Siabar susiedki pryvioz u pryznačany termin u ziamielny sud Inhalštata mierkavanuju złačyncu i čakaŭ u kalidory vykliku ŭ zału pasiadžeńniaŭ. Adnak da sudovaha dopytu kotki ŭ hety dzień nie dajšło: praces zakončyŭsia miravym pahadnieńniem.
Adkazčyca pahadziłasia na pałovu patrabavanaj sumy pry ŭmovie, što strachavaja kampanija, u jakoj jaje kotka zastrachavanaja na vypadak naniasieńnia joju škody, vypłacić nieabchodnuju kampiensacyju pa strachavym polisie. Na tym baki i syšlisia.
Papuhaj razbušavaŭsia
Litaralna ŭ toj ža dzień, kali kotku vyklikali ŭ sud, vinavatym inšaha skandału akazaŭsia… papuhaj.
Jak paviedamiła infarmacyjnaje ahienctva dpa, hety papuhaj spravakavaŭ vyklik palicyi. Achoŭnikam paradku patelefanavali z-za šumu i hrukatu padajučaj mebli ŭ susiedniaj kvatery: tam vidavočna bilisia nie na žyćcio, a na śmierć.
Kali narad palicyi prybyŭ na miesca zdareńnia, dźviery adčyniŭ mužčyna z akryvaŭlenaj nižniaj huboj. Jak jon patłumačyŭ, ranu jamu nanios papuhaj, jaki doŭha naziraŭ za słoŭnym skandałam pamiž damačadcami, a potym, vidać, jamu heta nadakučyła, i jon vyrašyŭ spynić palemiku i ŭmiašacca ŭ sprečku. Mebla, pa słovach haspadara kvatery, padała taksama pa vinie papuhaja, jaki lotaŭ pa kvatery. Haspadar sprabavaŭ złavić jaho i viarnuć u kletku, čaplajučysia pry hetym za kresły i inšuju meblu.
Palicyja nie stała davać hetaj spravie chod, tamu chto sapraŭdy byŭ vinavatym skandału — zastałosia niavyśvietlenym.
Drukujecca ŭ miežach śpiecyjalnaj rubryki «Naviny Hiermanii»
