Kijeŭskija ŭłady sprabujuć pieraškodzić pajezdkam ukrainskich turystaŭ na krymskija kurorty, zajaviŭ kiraŭnik rehijanalnaha mižnacyjanalnaha kamiteta Zaur Śmirnoŭ.
Pustyja plažy ŭ Krymie. Fota twitter.com/radist_titanika
«Kijeŭ sprabuje arhanizavać novuju błakadu paŭvostrava, na hety raz turystyčnuju. Našy krynicy ź liku słužačych dziaržaŭnaj pamiežnaj słužby Ukrainy paviedamlajuć pra toje, što atrymali ad kijeŭskaha kiraŭnictva kamandu stvarać štučnyja pieraškody», — raspavioŭ Śmirnoŭ RIAN.
Na jaho dumku, takija miery «pradyktavanyja stracham» taho, što «ŭkraincy ŭbačać realnuju abstanoŭku ŭ Krymie, dzie zamiest tankaŭ na vulicach i represij, jakija naviazvajucca kijeŭskaj prapahandaj, panuje mižnacyjanalnaja zhoda, iduć maštabnyja infrastrukturnyja prajekty».
«My rady bačyć ukrainskich turystaŭ u Krymie, dzie dla ŭsich adpačyvalnikaŭ stvoranyja kamfartabielnyja ŭmovy i harantavanaja biaśpieka. Ale sproba Kijeva błakavać pajezdki svaich hramadzian nas nie pałochaje, bo Krym nie zaležyć ad ukrainskaha turysta», — padkreśliŭ Śmirnoŭ.
Napiaredadni krymskaje pamiežupraŭleńnie FSB paviedamiła, što ŭkraincy nibyta stajać u kiłamietrovych čerhach, hadzinami čakajučy na pamiežnych punktach mahčymaści prajechać na adpačynak u Krym.
Tak, pavodle danych rasijskich pamiežnikaŭ, u subotu «z-za pieraškod ukrainskaha boku čas čakańnia ŭ čarzie pierad punktam propusku «Čanhar» u siarednim składaŭ kala 13 hadzin».
Raniej kiraŭnik parłamienckaha kamiteta respubliki pa sanatorna-kurortnym kompleksie i turyźmie Alaksiej Čarniak zajaviŭ, što sioleta «Krym naviedajuć sotni tysiač ŭkrainskich turystaŭ».
