Nacyjanalny archiŭ ZŠA rassakreciŭ častku dakumientaŭ, źviazanych z zabojstvam amierykanskaha prezidenta Džona Kienedzi. U pieršaj porcyi ahučanych fajłaŭ - zapisy intervju z ahientam KHB, uciekačom u ZŠA ŭ 1964 hodzie.
Nacyjanalny archiŭ ZŠA 24 lipienia pačaŭ publikacyju dakumientaŭ, jakija majuć dačynieńnie da zabojstva 35-ha prezidenta ZŠA Džona Kenedzi, havorycca na sajcie viedamstva. Na dadzieny momant dastupnyja bolš za 3,8 tys. dakumientaŭ FBR i CRU.
U liku ahučanych materyjałaŭ - 17 aŭdyjofajłaŭ ź intervju ahienta KHB Juryja Nasienka, jaki źbieh u ZŠA ŭ studzieni 1964 hoda, užo paśla zabojstva Kienedzi.
«Nasienka śćviardžaŭ, što ŭ bytnaść ahientam KHB jon vioŭ spravu Li Charvi Osvalda, kali toj pražyvaŭ u SSSR», - havorycca na sajcie archiva. Udakładniajecca, što intervju z Nasienkam było zapisana ŭ studzieni, lutym i lipieni 1964 hoda.
Vykładzienaja častka dakumientaŭ - tolki pieršaja porcyja materyjałaŭ, źviazanych z zabojstvam Kienedzi, zapłanavanych da publikacyi. Dakumienty byli sabranyja ŭ adpaviednaści z zakonam (The President John F. Kennedy Assassination Records Collection Act), jaki byŭ pryniaty kanhresam ZŠA ŭ 1992 hodzie. Dadzieny zakon abaviazvaŭ usie dziaržaŭnyja ŭstanovy źbirać i pieradavać materyjały, tak i ci inakš źviazanyja z zabojstvam 35-ha prezidenta, u Nacyjanalny archiŭ ZŠA.
Paviedamlajecca taksama, što bolš za 400 z ahučanych dakumientaŭ raniej byli całkam zasakrečanyja, jašče kala 3,3 tys. - raniej publikavalisia častkami ŭ adredahavanym vyhladzie.
35-y prezident ZŠA Džon Kenedzi byŭ śmiarotna paranieny strełam u hałavu 22 listapada 1963 hoda ŭ Dałasie (štat Techas), kali jechaŭ sa svajoj žonkaj Žaklin pa Ełm-stryt. Śpiecyjalnaja kamisija, jakaja rasśledavała złačynstva, pryjšła da vysnovy, što zabojstva ździejśniŭ złačynca-adzinočka Li Charvi Osvald. Adnak aficyjnaja viersija była pastaŭlenaja mnohimi amierykancami pad sumnieŭ.
Juryj Nasienka skončyŭ MHIMO, ad 1953 hoda pracavaŭ u KHB. U lutym 1964 hoda źbieh u ZŠA. Da 1969 hady amierykanskija śpiecsłužby padazravali jaho ŭ tym, što jon padvojny ahient. Paźniej staŭ štatnym supracoŭnikam CRU.
