Amierykanski rok-muzyka Elis Kupier znajšoŭ u kładoŭcy ŭ siabie doma zabytuju karcinu mastaka Endzi Uorchała, jakaja bolš za 40 hadoŭ pralažała siarod hastrolnaha abstalavańnia, paviedamlaje VVS.
RA
Kupier pryznaŭsia, što prosta zabyŭsia pra pracu Uorchała «Maleńkaje elektryčnaje kresła», padoranuju jamu jašče ŭ 1970-ch hadach.
«Heta byŭ čas rok-n-rołu, nichto z nas nie dumaŭ ni pra što», — skazaŭ były ahient Kupiera Šep Hordan.
Jašče adna viersija hetaj karciny Uorchała ŭ 2014 hodzie była pradadzienaja na aŭkcyjonie Shristie's u Ńju-Jorku za 10,5 młn dalaraŭ.
Jak piša brytanskaja hazieta Guardian, znojdzienaja karcina była častkaj sieryi Uorchała «Śmierć i Adčaj», jaje znajšli zhornutaj u trubku razam z rekvizitam dla vystupleńniaŭ 1970-ch hadoŭ. Mienavita tady i paznajomilisia Kupier i Uorchał. «Heta byŭ vir narkotykaŭ i vypiŭki», — apisvaje hety čas Šep Hordan.
Pa słovach mieniedžara, Kupier pierajechaŭ u Ńju-Jork sa svajoj siabroŭkaj Sindzi Łanh i paznajomiŭsia z Uorchałam u znakamitym ńju-jorkskim načnym kłubie Studio 54.
Paźniej Łanh paprasiła Hordana kupić karcinu Uorchała ad svajho imia za 2,5 tys. dalaraŭ i płanavała padaryć jaje Kupieru na dzień narodzinaŭ.
«Elis kaža, što pamiataje razmovu z Uorchałam z nahody karciny. Jon dumaje, što heta było na samaj spravie, adnak nie moža paklaścisia ŭ hetym na Biblii», — adznačaje Hordan u hutarcy z Guardian.
Adnak miescaznachodžańnie karciny ŭ vyniku raskryŭ nie sam Kupier, a jaho maci. «My pahavaryli z maci Elisa, jakaja skazała, što jana (karcina) moža ŭsio jašče być na składzie», — raspavioŭ Hordan Si-en-en, adznačyŭšy, što na pošuki karciny syšło amal paŭhoda.
Pa jaho słovach, u 1970-ja hady hetaja praca nie ličyłasia asabliva kaštoŭnaj, bo ŭ toj čas «Endzi Uorchał jašče nie byŭ Endzi Uorchałam».
Sapraŭdnaść pracy była paćvierdžanaja ekśpiertam pa tvorčaści Uorchała Ryčardam Połski.
«Vy b bačyli tvar Elisa, kali pryjšła acenka Ryčarda Połski. U jaho skivicu ŭpała i jon spytaŭ mianie: «Nie moža być! I heta majo?!»
