Jeŭrasajuz zaniepakojeny namierami ZŠA ŭvieści novyja sankcyi suprać Rasii, bajučysia, što jany mohuć paškodzić enierhietyčnym kampanijam.
Jeŭrakamisija zabiła tryvohu paśla taho, jak Pałata pradstaŭnikoŭ amierykanskaha Kanhresa padtrymała novyja antyrasiejskija sankcyi — niahledziačy na supraciŭ administracyi Trampa.
Novyja sankcyi płanujuć uvieści ŭ adkaz na mahčymaje ŭmiašańnie Rasii ŭ amierykanskija vybary ŭ 2016 hodzie.
Prezident Jeŭrakamisii Žan-Kłod Junkier zajaviŭ, što «ES całkam prychilny da režymu sankcyj suprać Rasii», adnak aścierahajecca «niepradkazalnych adnabakovych nastupstvaŭ, jakija paŭpłyvajuć na jeŭrapiejskija intaresy ŭ śfiery enierhietyčnaj biaśpieki».
Zaniepakojenaść vykazali i niekatoryja krainy ES, u pryvatnaści Hiermanija. Tam aścierahajucca, što amierykanskija sankcyi mohuć pieraškodzić raźvićciu sistemy trubapravodaŭ, jakija pastaŭlajuć rasijski haz u Jeŭropu - naprykład, abmiežavaŭšy dostup hetych kampanij da amierykanskich bankaŭ.
Pakul ES vykazvaje svaju zaniepakojenaść pa dypłamatyčnych kanałach. Adnak spadar Junkier zajaviŭ, što kali ich na hetym etapie nie prymuć da ŭvahi, ES «hatovy dziejničać naležnym čynam»
«Toje, što «Amieryka pieršaja», nie pavinna aznačać, što intaresy Jeŭropy pavinny być u kancy», - dadaŭ prezident Jeŭrakamisii.
Što praduhledžvajuć novyja sankcyi?
Śpikier Pałaty pradstaŭnikoŭ Poł Rajan nazvaŭ zakonaprajekt, jaki padtrymali 419 kanhresmienaŭ, pakietam sankcyj, jaki «zakručvaje hajki našym samym niebiaśpiečnym praciŭnikam dla biaśpieki amierykancaŭ».
Akramia Rasii, jon taksama nakładvaje abmiežavalnyja miery na Iran i Paŭnočnuju Kareju.
Kali zakonaprajekt prymuć, to jon:
Budzie štrafavać kampanii, u tym liku jeŭrapiejskija, jakija pracujuć u śfiery raźvićcia rasijskaj enierhietyki, u pryvatnaści prajektu «Paŭnočny patok-2» z Rasiei ŭ Niamieččynu.
Pamienšyć terminy pradastaŭleńnia pazyk rasijskim bankam i naftavym i hazavym kampanijam z boku amierykanskich bankaŭ.
Zamarozić aktyvy rasijskich dziaržaŭnych hornazdabyŭnych i čyhunačnych kampanij.
Zabiare ŭ prezidenta Donalda Trampa mahčymaść adnaasobna asłabić sankcyi - dla hetaha, zhodna z novym dakumientam, jamu pryjdziecca kansultavacca z Kanhresam.
U administracyi Trampa zaniepakojenyja hetym. Da hetaha času tradycyjna prezident ZŠA mieŭ prava bieśpieraškodna zdymać lubyja abmiežavalnyja miery.
Zakonaprajektu ŭsio jašče treba budzie prajści praz hałasavańnie ŭ Sienacie, dzie bolšaść naležyć respublikancam — tolki paśla hetaha jaho nakirujuć na podpis da prezidenta. U jaho taksama jość prava nakłaści na jaho vieta.
Za apošnija šeść miesiacaŭ prezidenctva Donalda Trampa adnosiny pamiž ZŠA i Rasiejaj abvastrylisia. U tym liku na fonie abvinavačvańniaŭ va ŭmiašańni Rasii ŭ amierykanskija vybary z metaj dapamahčy Trampu sieści ŭ prezidenckaje kresła.
ZŠA raniej, jašče pry prezidenctvie Baraka Abamy, užo ŭviali šerah sankcyj suprać Rasii z-za aneksii Kryma. Akramia taho, u śniežni, nieŭzabavie paśla prezidenckich vybaraŭ, Abama vysłaŭ z ZŠA 35 rasijskich dypłamataŭ.
