Za apošnija tryccać hadoŭ siaredniehadavyja tempieratury ŭ Biełarusi vyraśli na 1,3 hradusa. U našaj krainie stali vyroščvać bolš ciepłalubivyja sielskahaspadarčyja kultury i płanujuć skaracić vykid parnikovych hazaŭ u atmaśfieru.
- Klimat mianiajecca, heta ŭžo biassprečna, - raspavioŭ tut.by Viktar Mielnik, načalnik słužby navukova-mietadyčnaha zabieśpiačeńnia hidramietearałahičnaha i radyjacyjna-ekałahičnaha manitorynhu i fondaŭ dadzienych Respublikanskaha centra pa hidramietearałohii, kantroli radyjeaktyŭnaha zabrudžvańnia i manitorynhu navakolnaha asiarodździa.
Pavodle słoŭ śpiecyjalista, Biełhidramiet maje dadzienyja ab nazirańniach pačynajučy z XVIII stahodździa. U 1989 hodu pačaŭsia biezupynny rost tempieratury pavietra: za vyklučeńniem adnaho hoda, kožny nastupny hod byŭ ciaplejšy za papiaredni.
- Na terytoryi Respubliki Biełaruś siaredniaja šmathadovaja tempieratura pavietra ŭ paraŭnańni z klimatyčnuju normaj vyrasła na 1,3 hradusa, heta davoli značnaje pavieličeńnie, - adznačyŭ śpiecyjalist.
Z-za źmieny klimatu paniaćcie normy pryjšłosia pierahledzieć.
- Ad 1 lipienia hetaha hoda Biełhidramiet pierajšoŭ na novyja klimatyčnyja normy, - raspavioŭ Viktar Mielnik. - My raźličyli hetyja normy za pieryjad paciapleńnia z 1981 pa 2010 hod.
Na poŭdni Paleśsia vyłučyli novyja ahraklimatyčnyja vobłaści, u paŭdniovych rajonach krainy pačali vyroščvać novyja sielskahaspadarčyja kultury. Bolš raspaŭsiudžanyja stali vinahrad, bachčavyja i kukuruza.
- Pavieličeńnie praciahłaści viehietacyjnaha pieryjadu amal na miesiac, bolšaja kolkaść ciapła - heta dadatkovy faktar, jaki pry pravilnym viadzieńni sielskaj haspadarki daść dadatkovuju pradukcyju, - razvažaje śpiecyjalist Biełhidramieta. - Možna pryvieści prykład: ciapier Biełaruś vyroščvaje kukuruzu na ziernie. Pry tych tempieraturach, jakija byli da paciapleńnia, heta było praktyčna niemahčyma.
Ekśpiert ličyć, što praces paciapleńnia praciahvajecca, adnak rabić dakładnyja doŭhaterminovyja prahnozy nielha. Pavodle jaho słoŭ, vykid parnikovych hazaŭ, jaki časta źviazvajuć z hłabalnym paciapleńniem, moža być nie adzinaj pryčynaj źmieny klimatu.
U krasaviku minułaha hoda Biełaruś dałučyłasia da Paryžskaha pahadnieńnia pa baraćbie sa źmienaj klimatu. Naša kraina abaviazałasia źnizić vykidy parnikovych ŭ atmaśfieru na 28% u paraŭnańni z uzroŭniem 1990 hoda.
- Ja praktyčna ŭpeŭnieny, što my vykanajem heta, - ličyć Ivan Narkievič, hałoŭny navukovy supracoŭnik adździeła mižnarodnych prajektaŭ RUP «Bieł NDC «Ekałohija». - Zaraz my raspracoŭvajem stratehiju nizkavuhlarodnaha raźvićcia Respubliki Biełaruś. Źnižeńnie vykidaŭ adbudziecca za košt taho, što my bolš budziem vykarystoŭvać adnaŭlalnyja krynicy enierhii - viecier, vadu, ciapło, hidratermalnuju enierhiju. Ale pakul my znachodzimsia ŭ pačatku hetaha šlachu.
