Prodaž linzaŭ ŭ linzamatach u Biełarusi nie zabaroniać, ale na aŭtamatach raźmieściać infarmacyju ab nieabchodnaści prajści aftalmołaha. Takoje rašeńnie pryniataje siońnia paśla abmierkavańnia adpaviednaha pytańnia ŭ Ministerstvie achovy zdaroŭja, u jakim pryniali ŭdzieł pradstaŭniki biznesu i aftalmałahičnaja hramadskaść, pieradaje BIEŁTA.
Udzielniki pasiadžeńnia paćvierdzili, što linzy źjaŭlajucca vyrabami miedpryznačeńnia, adpaviedna ŭ najaŭnaści pavinna być rehistracyjnaje paśviedčańnie.
Pradstaŭniki biznesu i aftalmołahi pahadzilisia, što dla nabyćcia ŭsich linzaŭ abaviazkova nieabchodna mieć recept. Na kantaktnyja linzy, jak i na karyhujučyja akulary, jon dziejničaje adzin hod. Pry hetym namieśnik ministra achovy zdaroŭja Ihar Łasicki rastłumačyŭ, što recepty ŭ hetym vypadku pryznačanyja mienavita dla pacyjenta, kab toj viedaŭ, jakija kankretna linzy jamu nieabchodnyja. Tym samym čałaviek zmoža zabiaśpiečyć biaśpieku prymianieńnia vyrabaŭ i zaścierahčy siabie ad mahčymych uskładnieńniaŭ u vypadku niapravilnaha padboru.
Infarmacyja ab abaviazkovym naviedvańni aftalmołaha nie bolš čym za adzin hod da nabyćcia linzaŭ budzie raźmiaščacca na linzamatach. Infarmacyjnyja nadpisy ŭzhadniaje Ministerstva achovy zdaroŭja va ŭstanoŭlenym paradku. U Ministerstvie achovy zdaroŭja zaklikali nasielnictva źviartać uvahu na adpaviednuju infarmacyju i vykonvać nazvanyja tam patrabavańni.
U pierśpiektyvie na linzamatach mohuć źjavicca sčytvalnyja pryłady, jakija dazvolać atrymlivać paćviardžeńnie ad pacyjenta ab tym, što jon byŭ u doktara i maje recept. Hetaje pytańnie źviazanaje z raźvićciom sistemy elektronnaha receptu.
Baki taksama pryjšli da damoŭlenaści, što pry kupli linzaŭ praź internet pacyjentam nieabchodna budzie adpraŭlać skan recepta, a pradaŭcam — kopiju rehistracyjnaha paśviedčańnia.
