Rasijski prezident Uładzimir Pucin pamiłavaŭ žycharak Sočy Anik Kiesian i Marynu Džandžhavu, asudžanych pa artykule ab zdradzie za adpraŭku ŭ 2008 hodzie sms u Hruziju ab pieramiaščeńni rasijskaj vajennaj techniki ŭ Sočy, piša VVS.
Ukazy ab pamiłavańni apublikavanyja na aficyjnym internet-partale pravavoj infarmacyi RF. Jany ŭstupajuć u siłu praz 10 dzion paśla apublikavańnia.
U krasaviku stała viadoma, što Maryna Džandžhava i Anik Kiesian byli etapavanyja z kałonij u Vołahdzie i Mardovii ŭ maskoŭski SIZA «Lefortava».
Tady ich advakat Ivan Paŭłaŭ paviedamiŭ, što los jaho padabaronnych vyrašajecca «na samym vysokim uzroŭni».
Anik Kiesian i Maryna Džandžhava byli asudžanyja pa artykule 275 KK RF (dziaržaŭnaja zdrada) za adpraŭku ŭ 2008 hodzie svaim znajomym u Hruziju sms ab rasijskaj vajskovaj technicy, jakuju jany bačyli na čyhuncy. Marynu Džandžhavu ŭ 2014 hodzie prysudzili da 12 hadoŭ pazbaŭleńnia voli, Anik Kiesian — u 2015 hodzie da vaśmi hadoŭ kałonii.
U ŚMI bolš šyroka aśviatlaŭsia praces nad jašče adnoj žycharkaj Sočy — Aksanaj Sievastydzi, jakaja była asudžanaja ŭ sakaviku 2016 hoda na siem hadoŭ pazbaŭleńnia voli za toje, što ŭ 2008 hodzie adpraviła znajomamu ŭ Suchumi tekstavaje paviedamleńnie pra idučyja ŭ bok Abchazii tanki.
Rasijskaje śledstva śćviardžała, što znajomy Sievastydzi pracavaŭ na hruzinskuju vyviedku. Na hetaj padstavie ŭ dačynieńni da jaje raspačali spravu ab dziaržaŭnaj zdradzie ŭ formie špijanažu.
U sakaviku hetaha hoda Uładzimir Pucin pamiłavaŭ Sievastydzi. U chodzie vialikaj pres-kanfierencyi ŭ śniežni minułaha hoda Pucin nazvaŭ prysud Sievastydzi «dastatkova žorstkim».