U ofisie niezaležnaha prafsajuza REP siońnia zranku adbyŭsia pieratrus. Jaho pravioŭ Departamient finansavych rasśledavańniaŭ Kamiteta dziaržaŭnaha kantrolu. Kiraŭnikoŭ prafsajuza vinavaciać u niaspłacie padatkaŭ. Vyhladaje, što heta «sprava Bialackaha dubl 2».
Zatrymańni i pieratrusy
Siońnia ŭ minski ofis niezaležnaha prafsajuza REP zavitali siłaviki.
«Kala 9-j ranicy ŭ ofis pryjšli kala 10 čałaviek z Departamienta finansavych raśledavańniaŭ, — raspavioŭ «Našaj Nivie» Juryj Bielakoŭ, pravavy inśpiektar prafsajuza. — Pakazali pastanovu prakurora ab tym, što rasśledujecca sprava ab uchileńni ad spłaty padatkaŭ suprać Hienadzia Fiedyniča. Sutnaść jaje takaja ž, jak i była ŭ spravie Bialackaha», — kaža Bielakoŭ.
Sprava ab niaspłacie padatkaŭ raspačataja suprać traich supracoŭnikaŭ prafsajuza: Hienadzia Fiadyniča, Natalli Pičužkinaj i Ihara Komlika.
Pieratrus ciahnuŭsia kala šaści hadzin.
«U nas zabrali finansavyja dakumienty, niekalki kampjutaraŭ, ź inšych kampjutaraŭ zabrali žorstkija dyski. Pryčym ja prapanoŭvaŭ siłavikam addać finansavyja dakumienty adrazu, kab nie hramili ofis, ale jany skazali, što buduć šukać narkotyki i zbroju, — kaža Bielakoŭ. — Dźviery ŭ kabiniet Komlika złamali, bo nie było kluča ad ich…»
Lidara prafsajuza Hienadzia Fiadyniča zatrymali ranicaj doma.
Na dopyt zabrany taksama Mikałaj Hierasimienka, pres-sakratar REP.
Zatrymanaja taksama byłaja redaktarka sajta praca-by.info Natalla Pičužkina.
Jość infarmacyja, što siłaviki šukajuć hałoŭnaha buchhałtara prafsajuza Ihara Komlika.
Pieratrusy prajšli i ŭ kvaterach Fiadyniča, Komlika i Pičužkinaj.
Staršynia Biełaruskaha kanhresa niezaležnych prafsajuzaŭ Alaksandr Jarašuk na dadzieny momant znachodzicca ŭ Departamiencie finansavych rasśledavańniaŭ, chutčej za ŭsio, na dopycie.
«Jamu ranicaj telefanavali z DFR, «zaprašali», ale jon admoviŭsia jechać biez pozvy. Tady pryvieźli pozvu, — paviedamiŭ «Našaj Nivie» Siarhiej Antusievič, namieśnik Jarašuka. — Ja dumaju, što jaho nie buduć zatrymlivać — kab była raspačata kryminalnaja sprava suprać jaho, to ŭziali b adrazu doma».
Akramia taho amal adnačasova z vobšukam u Minsku prajšoŭ pieratrus i ŭ Salihorsku. Kala 10 ranicy siłaviki pryjšli ŭ ofis Biełaruskaha Niezaležnaha prafsajuza, tam rabotnikami finansavaj milicyi byŭ praviedzieny pieratrus. Pry paniatych byŭ składzieny pratakoł pieratrusu i kanfiskavanaja arhtechnika, jakaja znachodzicca ŭ ofisie (noŭtbuki i ćviordyja dyski stacyjanarnych kampjutaraŭ).
Pieratrus pravodziŭsia ŭ paradku zaviedzienaj kryminalnaj spravy. Što za sprava, supracoŭniki DFR nie paznačyli, spasłaŭšysia na tajamnicu śledstva. Z pastanovaj pra pieratrus i nierazhałošvańni byŭ aznajomleny pad podpis staršynia BNP Mikałaj Zimin.
Paśla ofisa, pieratrusy praviali ŭ kvaterach Mikałaja Zimina i sakratara-skarbnika BNP Śniažany Hryncevič. Sa słoŭ rodnych, ciapier ich zabrali ŭ Minsk na dopyt.
Fiadyniču i Komliku pahražaje da 7 hadoŭ
Kamitet dziaržkantrolu apublikavaŭ pres-reliz, pryśviečany zatrymańniam i pieratrusam u ofisach niezaležnych prafsajuzaŭ, jakija prajšli 2 žniŭnia.
«Orhanami finansavych rasśledavańniaŭ Kamiteta dziaržkantrolu pa faktach uchileńnia ad vypłaty padatkaŭ raspačata kryminalnaja sprava ŭ dačynieńni da kiraŭnikoŭ adnaho z prafiesijnych sajuzaŭ Respubliki Biełaruś, jakija nie ŭvachodziać u Fiederacyju prafsajuzaŭ Biełarusi, — paviedamlaje KDK. — U chodzie pravierki ŭstanoŭlena, što staršynia i hałoŭny buchhałtar prafsajuznaj arhanizacyi z metaj asabistaha ŭzbahačeńnia adkryli ad imia prafsajuza rachunki ŭ zamiežnych bankach, na jakija pastajanna pastupali bujnyja sumy hrašovych srodkaŭ (havorka idzie pra sotni tysiač dalaraŭ ZŠA)».
Pry hetym słužbovyja asoby prafsajuza parušyli patrabavańnie Nacyjanalnaha banka Respubliki Biełaruś ab nieabchodnaści atrymańnia śpiecyjalnaha dazvołu na adkryćcio rachunkaŭ za miažoj, padkreślivajuć siłaviki.
«Takim čynam jany sprabavali schavać fakty atrymańnia za miežami našaj krainy dachodaŭ i ŭchilicca ad vypłaty padatkaŭ z hetych dachodaŭ. Atrymanyja hrošy pieravodzilisia ŭ najaŭnyja i pieravozilisia ŭ respubliku, dla čaho dadzienyja słužbovyja asoby rehularna vyjazdžali za miežy krainy», — havorycca ŭ pres-relizie.
Raspačata kryminalnaja sprava suprać dvaich — Hienadzia Fiadyniča, staršyni prafsajuza, i Ihara Komlika, buchhałtara. Ich vinavaciać u niaspłacie padatkaŭ u asabliva bujnym pamiery. Fiadyniču i Komliku pahražaje da 7 hadoŭ z kanfiskacyjaj majomaści.
