U Lelčyckim rajonie 73-hadovy žychar vioski Hłuškavičy čatyry dni pravioŭ u lesie i samastojna znajšoŭ darohu dadomu, paviedamili va UUS Homielskaha abłvykankama.
Pošukami hrybnika zajmalisia miascovyja žychary i supracoŭniki milicyi. Mužčyna zmoh samastojna znajści vychad ź lesu i viarnuŭsia dadomu ranicaj 30 lipienia.
Usiaho z pačatku leta ŭ orhany ŭnutranych spraŭ Homielskaj vobłaści pastupiła 12 paviedamleńniaŭ ab źniknieńni tych, chto adpraviŭsia ŭ les pa jahady i hryby.
Tak, u Kalinkavickim rajonie šukajuć 70-hadovuju piensijanierku, jakaja pajšła ŭ hryby. Žančyna adpraviłasia ŭ les, raźmieščany niedaloka ad vioski Załatucha, viečaram 28 lipienia i dahetul nie viarnułasia. Pošukavyja mierapryjemstvy praciahvajucca.
Jašče adzin vypadak adbyŭsia ŭ Śvietłahorskim rajonie. 82-hadovaja žycharka vioski Vialikaja Ludvinaŭka praviała ŭ lesie kala troch sutak bieź ježy i vady. Šukali piensijanierku supracoŭniki milicyi, vajskoŭcy, miascovyja žychary. Źniasilenuju žančynu vynieśli ź lesu na rukach.
U milicyi nahadali, jak pravilna arhanizavać pachod u les. U pryvatnaści, adpraŭlajučysia ŭ hryby abo jahady, treba ŭziać sotavy telefon, pravieryŭšy zarad batarei. Rekamiendujecca vybirać jarkuju vopratku sa śviatłoadbivalnymi elemientami. Nie varta zabyvać i ab nieabchodnych lekach i vadzie. Niališnim buduć taksama zapałki, hadzińnik, kompas. Pierad vychadam z doma rekamiendujecca paviedamić rodnym, susiedziam, znajomym ab płanavanym maršrucie i praciahłaści pachodu.
