Hubiernatar amierykanskaha štata Virdžynija, dzie druhi dzień prachodziać akcyi pratestu ultrapravych i ich praciŭnikaŭ, zaklikaŭ zavadataraŭ sutyknieńniaŭ razyścisia pa damach.
Adna žančyna zahinuła i prynamsi 19 čałaviek paciarpieli ŭ vyniku incydentu ŭ horadzie Šarłatśvił. Pa apošnich dadzienych, aŭtamabil zajechaŭ u natoŭp tych, chto vystupaŭ suprać mitynhu ultrapravych.
Palicyja aryštavała 20-hadovaha Džejmsa Fiłdsa, što, jak miarkujecca, siadzieŭ za rulom mašyny. Jamu pradjaŭlena abvinavačvańnie ŭ zabojstvie druhoj stupieni.
Pa dadzienych palicyi, jašče 15 čałaviek paciarpieli ŭ vyniku sutyknieńniaŭ u inšych častkach horada. U niekalkich rajonach horada ŭviedziena nadzvyčajnaje stanovišča.
«Ja chaču źviarnucca da ŭsich prychilnikaŭ pieravahi biełaj rasy i nacystaŭ, jakija siońnia pryjšli ŭ Šarłatśvił. Naš zvarot vyrazny i prosty: razychodźciesia pa damach. Heta hramadstva nie prymaje vas. Hańba vam. Vy stroicie ź siabie patryjotaŭ, choć na samaj spravie vy chto zaŭhodna, ale nie patryjoty», - skazaŭ kiraŭnik štata Tery Makalif na pres-kanfierencyi.
«Siońnia vy pryjšli, kab naškodzić ludziam, i vy heta zrabili. Ale ja chaču jasna zajavić: my macniej za vas», - dadaŭ jon.
Hubiernatar-demakrat taksama paviedamiŭ, što ŭžo dvojčy paprasiŭ prezidenta ZŠA Donalda Trampa inicyjavać ruch dla zhurtoŭvańnia ludziej.
Akcyja «Abjadnajem pravych» zajaŭlałasia jak mitynh pratestu suprać płanaŭ demantažu statui hienierała Robierta Li ŭ parku Vyzvaleńnia (čarnaskurych raboŭ) u centry Šarłatśviła i pavinna była pačacca ŭ apoŭdni pa miascovym časie. Hienierał Li kamandavaŭ armijaj paŭdniovych štataŭ, jakija paciarpieli paražeńnie ŭ Hramadzianskaj vajnie 1861-65 hadoŭ.
Palicyja abviaściła niezakonnym pravaradykalny mitynh i zapatrabavała ad prysutnych pakinuć paśla taho, jak pamiž mitynhoŭcami i ich supiernikami pačalisia sutyknieńni.
Jak paviedamlaje Washington Post, siarod mitynhoŭcaŭ, jakija pačali źbiracca jašče ŭ piatnicu ŭviečary, była zaŭvažana vialikaja kolkaść radykałaŭ, u tym liku nieanacystaŭ, «alternatyŭnych pravych» (biełych nacyjanalistaŭ) i aktyvistaŭ rasisckaj arhanizacyi «Ku-kłuks-kłan». Jany vykrykvali łozunhi, u pryvatnaści «Habrej nas nie zamienić», paviedamlaje New York Times.
