Suśvietnyja ceny na naftu ŭ paniadziełak praciahvali apuskacca na zaniepakojenaści inviestaraŭ vysokim uzroŭniem zdabyčy «čornaha zołata» krainami APIEK, u pryvatnaści ŭ Livii, śviedčać źviestki tarhoŭ.
Cana kastryčnickich fjučarsaŭ na paŭnočnamorskuju naftavuju sumieś marki Brent źniziłasia na 0,69% - da 51,74 dalara za barel. Košt vieraśnioŭskich fjučarsaŭ na naftu marki WTI taksama pamianšałasia na 0,55%, da 48,55 dalara za barel.
Trejdary zaniepakojenyja vysokim uzroŭniem zdabyčy syraviny krainami APIEK. Zhodna z žnivieńskim dakładam Mižnarodnaha enierhietyčnaha ahienctva (MEA), APIEK ŭ lipieni naraściła zdabyču nafty na 230 tysiač barelaŭ u dzień u paraŭnańni z červieniem - da maksimalnaha pakazčyka 2017 hoda ŭ 32,84 miljona barelaŭ u sutki. Kala 70% rostu zdabyčy nafty ŭ krainach APIEK prypadaje na Liviju i Nihieryju, adznačałasia ŭ dakładzie.
APIEK i šerah krain, jakija nie ŭvachodziać u arhanizacyju, damovilisia ŭ kancy 2016 hoda ŭ Vienie ab skaračeńni svajoj zdabyčy nafty sumarna na 1,8 miljona barelaŭ u sutki z kastryčnickaha ŭzroŭniu. Pahadnieńnie było zaklučana na pieršaje paŭhodździe 2017 hoda, a ŭ mai padoŭžanaje jašče na dzieviać miesiacaŭ - da kanca sakavika 2018 hoda. Livija i Nihieryja pry hetym vyzvalenyja ad abaviazalnictvaŭ, pakolki naftavaja pramysłovaść hetych krain mocna paciarpieła ad dziejnaści ŭzbrojenych hrupovak.
«Adnaŭleńnie zdabyčy ŭ Livii stała samym značnym faktaram, jaki stymulavaŭ rost suśvietnaj zdabyčy ŭ apošnija niekalki miesiacaŭ», - pryvodzić ahienctva Rejter słovy naftavych analitykaŭ Panmure Gordon. Pry hetym raniej ahienctva Błumbierh paviedamlała sa spasyłkaj na znajomuju ź situacyjaj krynicu, što zdabyča nafty na najbujniejšym radoviščy Livii Šarara (Sharara) u niadzielu ŭpała na tracinu z-za uzbrojenych biesparadkaŭ.
