Telekanał «Biełsat» prapanoŭvaje efir kandydatam u deputaty. Pra heta BiełaPAN paviedamiŭ pres‑sakratar telekanała Siarhiej Pielasa.
Pavodle jahonych słoŭ, telekanał prapanoŭvaje kandydatam u deputaty Pałaty pradstaŭnikoŭ mahčymaść paznajomić vybarščykaŭ sa svajoj prahramaj ŭ efiry «Biełsata».
Kožny hramadzianin, zarehistravany Centralnaj vybarčaj kamisijaj Respubliki Biełaruś u jakaści kandydata ŭ deputaty Pałaty pradstaŭnikoŭ, biez uvahi na prynaležnaść da palityčnaj partyi ci pohlady, maje prava pakazać biaspłatna adnu pieradaču z maksimalnaj praciahłaściu da 8 chvilinaŭ.
Umovaj atrymańnia efirnaha času źjaŭlajecca dastaŭka da 15 vieraśnia hatovaj pieradačy na nośbicie, adpaviednym techničnym paramietram telebačańnia. Da pieradačy musiać być dałučanyja list ź piśmovaju zhodaj kandydata na tranślacyju ŭ efiry «Biełsata» jahonaj pieradačy, kopija paśviedčańnia, jakaja paćviardžaje fakt rehistracyi kandydata ŭ deputaty Pałaty pradstaŭnikoŭ, i paśviedčańnie, što kandydat maje pravy na demanstracyju svajoj pieradačy.
«Efir prapanujecca absalutna ŭsim kandydatam, jakija byli zarehistravanyja ŭ takoj jakaści, niezaležna ad ich pohladaŭ i palityčnaj pazicyi», — zaznačyŭ S.Pielasa.
Pieradačy buduć demanstravacca ŭ błokach pad nazvaju «Vybary‑2008. Kandydaty» ad 16 da 26 vieraśnia ŭ najlepšy efirny čas. Paśla tranślacyi ŭ efiry vybarčy błok z\javicca na sajcie www.belsat.eu. «Biełsat» nie budzie ŭmiešvacca ŭ źmiest pieradačaŭ, ale pakidaje za saboju prava admović u efiry ŭ vypadku, kali materyjał parušaje dziejnaje zakanadaŭstva ci zaklikaje da jaho nievykanańnia. «Biełsat» nie adkazvaje za źmiest videamateryjałaŭ, padadzienych kandydatami. Pra heta hledačoŭ budzie infarmavać paviedamleńnie pierad błokam i padčas pieradačy», — skazaŭ S.Pielasa.
