Amierykanskaja karparacyja Apple adkłała kala $1 młrd na nabyćcio i vytvorčaść aryhinalnaha telekantentu ŭ 2018 hodzie. Hetaj sumy dastatkova dla zdymak 10 televizijnych šou, paviedamiła ŭ sieradu ŭ svajoj elektronnaj viersii hazieta The Wall Street Journal.
Vydańnie paraŭnoŭvaje hety biudžet z metavymi vydatkami telekanała HBO, jaki naležyć karparacyi Time Warner, a taksama Amazon. HBO vydatkavaŭ letaś na hetyja mety ŭdvaja bolš, čym Apple, a Amazon prykładna stolki ž, ale ŭ 2013 hodzie. Pavodle acenki vydańnia, usio heta całkam układajecca ŭ ideju vice-prezidenta Apple Edzi Kju nakont razhortvańnia žorstkaj kankurencyi na rynku vysakajakasnaha videa, uzoram jakoha źjaŭlajecca sieryjał «Hulnia tronaŭ», demanstravany na kanale HBO.
Adviedzieny pad zakupku kantentu biudžet buduć raźmiarkoŭvać ekśpierty rynku telebačańnia i kino Džejmi Erlicht i Zak Van Amburh, jakich karparacyja na čale ź Cimam Kukam pieravabiła z Sony ŭ červieni. Košt adnaho epizodu telesieryjała ŭ ZŠA składaje $ 2 - $ 5 młn, udakładniaje hazieta, a zdymki adnoj sieryi takoj jakasnaj pradukcyi, jak «Hulnia tronaŭ», mohuć kaštavać bolš jak $ 10 młn.
Pa vynikach treciaha finansavaha kvartała, jaki zaviaršyŭsia 30 červienia biahučaha hoda, vyručka Apple vyrasła da $ 45,41 młrd, što taksama pierasiahnuła prahnozy ekśpiertaŭ. Letaś u trecim finansavym kvartale, jaki tradycyjna ličycca słabiejšym dla kampanii ŭ płanie prybytkaŭ, vyručka składała $ 42,36 młrd. Čysty prybytak za nazvany pieryjad zafiksavana na ŭzroŭni $8,72 młrd, abo $1,67 za akcyju (u minułym hodzie - $7,8 młrd, abo $ 1,42 za akcyju).
Zasnavanaja ŭ 1976 hodzie Apple vyrablaje smartfony iPhone, płanšetnyja kamputary iPad, naŭtbuki MacBook, nastolnyja kamputary iMac, muzyčnyja płejery iPod, a taksama inšuju techniku. Karparacyja źjaŭlajecca adnoj z najbujniejšych u śviecie, jaje rynkavaja kapitalizacyja pieravyšaje 780 młrd dalaraŭ.
