Alaksandr Łukašenka daručyŭ dakładna ŭrehulavać pytańnie hrašovych vypłat spartsmienam i trenieram z pryviazkaj da peŭnaha vyniku. Pra heta kiraŭnik dziaržavy zajaviŭ siońnia na sustrečy z hulcami i trenierskim składam chakiejnaha kłuba «Dynama-Minsk», pieradaje BIEŁTA.
«My vybudavali sistemu materyjalnaha i hrašovaha zabieśpiačeńnia chakieistaŭ. Heta budzie ŭ lubym vidzie sportu, hulniavych pierš za ŭsio», — zajaviŭ jon.
Pavodle słoŭ Łukašenki, kali kazać kankretna pra chakiej, to asnoŭnyja kantrakty i zarobak buduć u «Dynama-Minsk» i nacyjanalnaj zbornaj. «Tam buduć prystojnyja hrošy. Usie astatnija pavinny zarablać u kłubach stolki, kab narmalna pracavać, tamu što sport — heta praca, i narmalna žyć, tamu što siamji jość. Ale nie $19 tys. u miesiac, jak niekatoryja treniery mieli siaredniuju zarpłatu pa minułym siezonie, nie zajmajučy pieršaha miesca», — adznačyŭ biełaruski lidar.
«Tamu, jak u Kanadzie, jak u ZŠA, u nižejšaj lizie buduć atrymlivać nievialikija hrošy, kab u chakieistaŭ było imknieńnie padniacca navierch — zavajavać miesca ŭ «Dynama», u zbornych kamandach (moładzievaj, junackaj, asnoŭnaj). Tam buduć narmalnyja hrošy, — padkreśliŭ jon. — Tamu nijakich šalonych hrošaj bolš nie budzie».
Łukašenka kanstatavaŭ, što niekatoryja treniery, kiraŭniki kłubaŭ, atrymlivajučy vialikija hrošy, žyli ŭ niekalki razoŭ lepš, čym ministry. «Heta što, narmalna? Nie dajučy nijakich vynikaŭ, nijakaj efiektyŭnaści, nijakaj mieniedžarskaj pracy, — adznačyŭ biełaruski lidar. — Hetamu razboju treba pakłaści kaniec».
Jon rastłumačyŭ, što pa novaj sistemie, kali chakieist u ekstralizie zaniaŭ pieršaje miesca, to jaho hadavaja zarpłata pavinna, naprykład, padvoicca. «Za pieršaje miesca 100% pavieličeńnie. Za druhoje, dapuścim, 80%. Za treciaje miesca — 60% i hetak dalej. Ale ŭsio budzie nacelena na vynik. Nielha płacić usim paroŭnu. Heta kryŭdzić lepšych spartsmienaŭ», — padkreśliŭ Łukašenka.
«Hrošy treba zarablać i adpracoŭvać. Taki moj pryncypovy padychod. A kankretnyja rečy vypracavali va ŭradzie», — adznačyŭ jon.
Pry hetym Łukašenka ŭdakładniŭ, što kali hrošy zaroblenyja za košt jakich-niebudź inšych vidaŭ dziejnaści, sponsarskich srodkaŭ, to jany buduć naležać vyklučna kłubu i ich možna budzie nakiroŭvać u tym liku na materyjalnaje stymulavańnie. «Heta vašy hrošy, i vy, kali łaska, addajcie kamandzie. I padzialicie pamiž saboj. Heta vašy hrošy, nichto da ich nie dakraniecca. Ja vam publična pra heta kažu», — skazaŭ jon.
«Za hrošy možacie nie turbavacca, kali vy vykonvajecie svaje abaviazacielstvy i dobra hulajecie, — padkreśliŭ biełaruski lidar. — I dalej my budziem tolki rabić bolš žorstkimi hetyja patrabavańni. My pastarajemsia płacić dobramu hulcu, jaki zmahajecca na placoŭcy, šmat, kab pakazać inšym, jak treba hulać. A tyja, chto nie daje vynik, tak i atrymajuć».
«Usie, chto pracuje ŭ kamandzie i na kamandu, nie pavinny być pakryŭdžanyja», — reziumavaŭ kiraŭnik dziaržavy
