Jak paviedamiŭ RIA «Naviny» pradstaŭnik ambasady Rasiei Mikałaj Łachonin, pry pieratrusach prysutničajuć dypłamaty. «Paśla nastojlivaha patrabavańnia rasijskaha boku supracoŭniki ambasady byli dapuščanyja da nadhladu», — skazaŭ jon.
U samym handlovym pradstaŭnictvie zajavili, što ličać pieratrusy rejdarskim zachopam rasijskaj ułasnaści, jaki parušaje mižnarodnyja kanviencyi.
Jak adznačajuć supracoŭniki pasolstva, amierykancy pierastali ličyć budynak pradstaŭnictva dypłamatyčnym abjektam, jaki vałodaje imunitetam. Z dypmisii vyvieźli ŭsie rečy, nieabchodnyja dla jaje funkcyjanavańnia.
Raniej siońnia MZS RF uručyŭ notu pratestu daradcy-pasłancu pasolstva ZŠA ŭ Maskvie z-za płanaŭ uładaŭ Złučanych Štataŭ pravieści pieratrus u rasijskim handlovym pradstaŭnictvie ŭ Vašynhtonie. U zamiežnapalityčnym viedamstvie nazvali pieratrusy biesprecedentnaj, ahresiŭnaj akcyjaj, jakuju amierykanskija śpiecsłužby, padkinuŭšy kampramietujučyja pradmiety, mohuć vykarystoŭvać dla pravakacyj.
Dziarždepartamient ZŠA raniej zapatrabavaŭ začynić konsulstva Rasii ŭ San-Francyska i dva budynki handlovaha pradstaŭnictva ŭ Vašynhtonie i Ńju-Jorku da 2 vieraśnia, matyvujučy heta adkazam na prapanovu Maskvy skaracić kolkaść rabotnikaŭ dypmisii ZŠA ŭ Rasii.
