Mižnarodny paralimpijski kamitet (MPK) admoviŭ Paralimpijskamu kamitetu Rasii (PKR) u adnaŭleńni členstva ŭ arhanizacyi, paviedamlaje «R-Sport». Jak zajaviŭ prezident MPK Filip Krejvien, rasijskija paralimpijcy nie zmohuć prymać udzieł u mižnarodnych spabornictvach, u tym liku i na Hulniach-2018 hodzie ŭ paŭdniovakarejskim Pchienčchanie.
Rašeńnie ab admovie ŭ adnaŭleńni členstva PKR było pryniataje na pasiadžeńni vykankama MPK ŭ Abu-Dabi. U chodzie pasiadžeńnia byli razhledžanyja dakumienty i materyjały, pradstaŭlenyja rasijskim bokam. Napiaredadni vykankama prezident PKR Uładzimir Łukin zajaŭlaŭ ab pryznańni rabočaj hrupaj MPK vykanańnia kryteryjaŭ adnaŭleńnia PKR.
«My razhladajem ciapier heta rašeńnie. My byli hatovyja ŭ tym liku i da takoha scenaru. U bližejšy čas sumiesna z PKR praanalizujem hetuju infarmacyju i vypracujem ahulnuju pazicyju», — zajaviŭ ministr sportu Rasii Pavieł Kałabkoŭ.
U krasaviku 2017 hoda člen vykankama PKR Michaił Ciarenćjeŭ pryniaŭ udzieł u pasiadžeńni Rady spartsmienaŭ MPK. Na hetym pasiadžeńni jon prapanavaŭ dazvolić rasijanam vystupać pad niejtralnym ściaham da tych časoŭ, pakul nie budzie adnoŭlenaje členstva PKR. Hetaja prapanova była adchilenaja.
MPK patłumačyŭ svajo rašeńnie tym, što prava na vystup pad niejtralnym ściaham dajecca tolki biežancam i tym spartsmienam, u čyich krainach niama nacyjanalnaha paralimpijskaha kamiteta.
U žniŭni 2016 hoda z-za paviedamleńniaŭ ab prymianieńni dopinhu MPK pryniaŭ rašeńnie prypynić členstva PKR ŭ arhanizacyi i adchiliŭ rasijskich paralimpijcaŭ ad hulniaŭ u Rya-de-Žaniejra.
U listapadzie 2016-ha ŭ MPK nazvali ŭmovy adnaŭleńnia členstva rasijskaha kamiteta. U liku patrabavańniaŭ akazaołasia vypłata €250 tys. za kožny kalandarny hod adchileńnia spartsmienaŭ i pavyšeńnie strohaści dopinh-kantrolu.
XII Paralimpijskija zimovyja hulni projduć u paŭdniovakarejskim Pchienčchanie z 9 pa 18 sakavika 2018 hoda. U vypadku, kali da Paralimpijady-2018 MPK nie zdymie sankcyi ŭ dačynieńni da rasijskich spartoŭcaŭ, jany buduć vymušanyja znoŭ prapuścić spabornictvy.
