Kiroŭcaj mašyny akazałasia 39-hadovaja Vitalina Nienarokamava.
Fota Vity z sacsietak.
Žančyna pracuje seo-śpiecyjalistam u kampanii, jakaja zajmajecca koŭkaj. Jana raskazała «NN», što jašče i nie raźviałasia z byłym mužam, ale jany nie žyvuć razam užo jak paŭhoda, tamu jana pačała šukać novaha: «Naš šlub — tolki farmalnaść».
«Nalepku z abjavaj i maim numaram telefona ja zakazała tydzień tamu. Maleńkaja dačka, kaniešnie, mianie nie razumieje, usio pytajecca: «Mama, navošta ty šukaješ novaha tatu?». Ale ja ŭžo baču, što taki mietad vielmi efiektyŭny. Možacie tak i napisać: heta vydatny sposab paznajomicca z novymi ludźmi i pavialičyć kancentracyju mužčyn u svaim žyćci. Kab u žančyny byŭ vybar i joj nie prychodziłasia pahadžacca na pieršaha sustrečnaha».
Nakolki taki sposab znajomstvaŭ efiektyŭny? Miarkujcie sami: u siarednim žančynie telefanujuć try razy za dzień. Kožny viečar jana chodzić na novaje spatkańnie. Siarod patencyjalnych žanichoŭ traplalisia i nieadekvaty: tak, pjanaja kampanija na čale z alfa-samcom-vachcioram sprabavała padrezać Vitu na «Žyhulach»: prapanovu rabili prama na chadu. Ale žančyna ich adšyła: «Chočacca znajści kali nie prynca, to dakładna nie rabočaha-ałkaholika, taho, chto moža pačastavać kubačkam kavy».
Vita pryznajecca, što navat kali nie znojdzie žanicha, to novyja znajomstvy — heta jakraz toje, čaho joj u žyćci nie chapała.
Žančyna maje akaŭnty i ŭ sacsietkach, ale adznačaje, što ŭ chłopcaŭ, jakija tam siadziać, mała inicyjatyvy.
«Jak pakazvaje praktyka, mužčyny ź internetu siadziać dupaj na kanapie i tolki na pierapisku zdolnyja. Na spatkańnie jany zaprašajuć zredku, a voś mužčyny, jakija telefanujuć, kličuć zhaniać na kavu amal adrazu. Moža, pracuje atmaśfiera darohi, ruchu?», — miarkuje žančyna.
Čaściej astatnich joj za hety čas telefanavali maładyja ludzi da 37 hadoŭ. Vita kaža, što heta tamu, što im padabajucca avantury.
Praŭda, spłanavać sustreču narmalna jany nie mohuć: pakidajuć hety abaviazak za žančynaj. Adzin raz numar nabraŭ 50-hadovy načalnik, ale sustrakacca čamuści pasaromieŭsia. Cikava, što mužčyn nie pužaje dziciačaje ružovaje kresła ŭ mašynie: znak, što ŭ kiroŭcy jość dzicio. «Dla niekatorych mužčyn heta navat bonus», — ličyć Vita.
Praŭda, pakul ni adzin z hetych džentlmenaŭ hieraini nie spadabaŭsia, tamu zdymać z mašyny nalepku jana nie dumaje, choć jaje kreatyŭ nie acaniŭ navat načalnik z pracy.
Pošuki idealnaha kandydata praciahvajucca.
