U vučeńniach na palihonie «Hančaroŭskaje» ŭ Čarnihaŭskaj vobłaści, što pačalisia siońnia pad apieratyŭnym kamandavańniem štabu suchaputnych vojskaŭ Uzbrojenych sił Ukrainy «Poŭnač», na pieršym etapie voźmuć udzieł bolš jak 1000 reziervistaŭ, jakija ŭžo adsłužyli hod pa mabilizacyi i majuć dośvied viadzieńnia bajavych dziejańniaŭ na ŭschodzie Ukrainy.
«Asnoŭnaj metaj praviadzieńnia vučeńniaŭ reziervistaŭ jość adnaŭleńnie navykaŭ asabistaha składu apieratyŭnaha reziervu da dziejańniaŭ u składzie padraździaleńniaŭ i padrychtoŭka da vykanańnia adpaviednych zadač», — skazali Radyjo Svaboda ŭ pres-słužbie apieratyŭnaha kamandavańnia «Poŭnač».
Surazmoŭca padkreśliŭ, što ŭ časie vučeńniaŭ buduć adpracoŭvacca ŭsie elemienty bajavoj padrychtoŭki. A sami manieŭry zojmuć miesiac — faktyčna da zaviaršeńnia biełaruska-rasiejskich vučeńniaŭ «Zachad-2017».
Papiarednija vajskovyja vučeńni suchaputnych vojskaŭ Ukrainy na palihonie «Hančaroŭskaje» prachodzili z 29 žniŭnia da 1 vieraśnia. Kamandavańnie «Poŭnač» — apieratyŭnaje abjadnańnie suchaputnych vojskaŭ Uzbrojenych siłaŭ Ukrainy, jakoje dziejničaje na terytoryi Žytomirskaj, Kijeŭskaj, Pałtaŭskaj, Sumskaj, Čarkaskaj i Čarnihaŭskaj abłaściej i Kijeva.
Paralelna, ad pačatku vieraśnia, va Ukrainie ŭ ramkach apieratyŭnaj padrychtoŭki Hienieralnaha štaba Uzbrojenych siłaŭ pry ŭdziele pamiežnych vojskaŭ praciahvajucca dvuchstupiennyja kamandna-štabnyja vučeńni orhanaŭ kiravańnia i padraździaleńniaŭ orhanaŭ achovy dziaržaŭnaj miažy.
