Taki sposab pracuje kudy lepš za ŭsialakija «cindary» i sajty znajomstvaŭ: pa słovach žančyny, u dzień joj telefanujuć minimum try razy.
Siońnia my źviazalisia ź jašče adnym minčukom, jaki paviesiŭ abjavu «Šukaju žonku, a maci niaviestku» na svoj transpart jašče ŭ červieni. Zavuć jaho Alaksiej Kałamijcaŭ, jamu 27 hadoŭ, pracuje kiroŭcam. Praŭda, čamuści takoha pośpiechu, jak Vita, jon nie maje: za čatyry miesiacy chłopcu patelefanavali ŭsiaho 10 pretendentak na ruku i serca.
Alaksiej miarkuje, što heta tamu, što dziaŭčaty nie ŭsprymajuć padobnyja abjavy surjozna, a jašče bajacca rabić pieršy krok. «Jany dumajuć, što heta žart, telefanujuć i śmiajucca. A ja ž sur' jozna! Užo paśpieŭ nahulacca, dy j maci taksama pytajecca pra niaviestku!» — raskazaŭ «NN» Alaksiej.
Alaksiej Kałamijcaŭ
Jak i Vita, jon nie ŭsprymaje sacsietki i ličyć, što jany tolki marnujuć čas. U jakaści budučaj žonki Alaksiej chacieŭ by bačyć pobač «dobruju haspadyniu z hałavoj na plačach, nie vielmi toŭstuju i dahledžanuju».
My prapanavali chłopcu skantaktavacca ź Vitaj, ale jon baicca, što 39-hadovaj žančynie budzie nie cikava z tym, chto maładziejšy za jaje na 12 hadoŭ.
Ź cikaŭnaści my patelefanavali ŭ servis, jaki zajmajecca vyrabam viniłavych nalepak i spytalisia, nakolki časta biełarusy zamaŭlajuć takija siužety.
«Z prośbaj vyrabić nalepki z pošukam žonki ci muža da nas źviartajucca pryblizna try razy ŭ miesiac. Čaściej za ŭsio heta robiać dziaŭčyny. U ich byvajuć vielmi niezvyčajnyja teksty: «Dahoniš — vyjdu zamuž», «Hałava nie balić», «Šuba jość», «Prapiska jość»… Nu, i paśla idzie prapanova ažanicca z numaram telefona. Chłopcy ŭ hetym płanie bolš ścipłyja: nalepka, jak u Alaksieja, heta dla ich — vierch kreatyvu», — raskazaŭ «NN» pradprymalnik Źmicier Damarad.
Kaštujuć takija ŭpryhažeńni na aŭto da 13 rubloŭ, u zaležnaści ad pamieraŭ.
