Karystalnik fejsbuka Aleś Mielichaviec źviarnuŭ uvahu, što na feście «Minsk staražytny», jaki prachodziŭ 9-10 vieraśnia ŭ ramkach Dnia horada, byŭ źmieščany biłbord z čałaviekam u formie vajskoŭca časoŭ Rasijskaj impieryi. Da zdymka źmiaščaŭsia podpis «Puť k niezavisimosti».
Banier źmieščany namahańniami MTIS (Minskija tielevizijnyja infarmacyjnyja sietki). Mielichaviec, a śledam i mnohija inšyja, paličyli, što na biłbordzie vyjava vilenskaha hubiernatara Michaiła Muraŭjova-viešalnika. Taho samaha, chto zadušyŭ paŭstańnie 1863-1864 pad kiraŭnictvam Kastusia Kalinoŭskaha.
«Šlach da niezaležnaści» u MTIS i inšych […] atajasamlivajecca z čałaviekam, padobnym da hrafa Muraŭjova, jaki viešaŭ udzielnikaŭ paŭstańnia za niezaležnaść. Jašče ŭ tym nabory jość kabietka z hubiernskaha horada Rasijskaj impieryi, sałdat rasijskaj armii (z tych, «na čyich štykach» tut impierski paradak trymaŭsia), chto-niebudź z voinaŭ u škurach (ok, dapuścim), niejki znoŭ-taki impierskaha vyhladu mieščanin. I ŭsio heta šyła za naš košt zdymałasia, prydumlałasia, drukavałasia i na Dni horada vyviešvałasia», — napisaŭ Mielichaviec.
«Kaniečnie, heta nie Muraŭjoŭ-viešalnik! — na čyściutkaj biełaruskaj movie adkazvaje hienieralny pradziusar MTIS Alaksiej Hurski. — Heta zborny vobraz aficera Minskaha piachotnaha pałka ŭzoru 1812 hoda. Była takaja staronka ŭ našaj historyi. Vas zasmučaje hierb Rasijskaj impieryi na jahonaj formie? Na hetaj ža vystavie była vyjava i aficera 22-aha piachotnaha pałka VKŁ, jaki vajavaŭ na baku Napaleona. Biełarusy ŭ vajnu 1812 hoda byli pa abodva baki. Hetaha nijak nie vykinieš».
Alaksiej Hurski patłumačyŭ, što akcyjaj «Šlach da niezaležnaści» adlustroŭvałasia tysiačahadovaja historyja Biełarusi. «Byli samyja roznyja vyjavy. Ad VKŁ da Druhoj suśvietnaj vajny», — kaža jon.
