Rasijski sajt «Vojennoje obozrienije» maje dastatkova bahatuju aŭdytoryju. Pavodle źviestak similiarweb, u miesiac jaho čytaje 22 miljony karystalnikaŭ. Heta bolej, čym u «Rehnuma» i nie našmat mieniej, čym u «Mieduzy».
11 vieraśnia na sajcie «Vojennoho obozrienija» źjaviŭsia artykuł «Rasija jak ahresar: chto nastupny na zavajavańnie?»
«Niekatoryja prosta zachodziacca ŭ isteryi, što ich zaŭtra (u krajnim vypadku paślazaŭtra) akupujuć rasijskija vojski, što chłynuć z-za miažy», — piša aŭtar vydańnia Raman Skamarochaŭ.
«Chto najbolš kryčyć ab vajnie/akupacyi? Ukraina, Litva, Łatvija. Plus niejkaje abvastreńnie ŭ Biełarusi na temu taho, što pad vidam vučeńniaŭ Rasija moža zładzić anieksiju».
Paśla aŭtar pryvodzić šerah krain, jakija dziakujučy Rasii nibyta atrymali niezaležnaść — Finlandyja, Polšča, Bałharyja, Rumynija, Sierbija, Armienija, Azierbajdžan, Hruzija, Turkmienistan, Małdova, Kazachstan, Manholija, Łatvija, Litva, Estonija, Ukraina, Biełaruś.
«Dyk čamu stolki krykaŭ ad «byłych»? Čamu jany tak bajacca hetaj samaj akupacyi i anieksii? Mabyć, sprava ŭ tym, što ŭ tych krainach hetaja akupacyja prosta žadanaja. Vyklučajem Biełaruś, tam ciažkavata, ale nie nastolki jašče, kab maryć ab akupacyi Rasiejaj. Tamu paasobnyja kryki pra toje, što «zaŭtra nas zachopiać i zaniavolać», — heta tak… pravierka. Ale voś astatnija… Składvajecca uražańnie, što ŭ Prybałtycy sapraŭdy chočuć, kab Rasieja ich akupavała», — ličyć Skamarochaŭ.
Čamu Bałtyja prahnie hetaj akupacyi? Bo pabačyli prykład Krymu. «Hety akupavany i anieksavany Krym, kudy paciakli hrašovyja reki, materyjały i ludskija resursy. I darohi namalavalisia, i prablemy pačali vyrašacca. Heta ja pra vadu, elektryčnaść… enierhamasty, prosta masty… Možna pra plusy doŭha havaryć. Nu i plus — mahčymaść na ŭsim hetym padzarabić. Tak što ŭsie hetyja «zakłapočanaści» i «zaściarohi» akupacyjaj vyhladajuć usio bolš padobna na žałobny zaklik: «Nu akupujcie nas narešcie!» Hrošaj dajuć ŭsio mienš… na niezaležnaść. A tak — dobra było b, praŭda? Ažyłyja party i terminały Prybałtyki, na jakija raptam viarnuŭsia rynak zbytu hetych… rybak vendžanych, turysty znoŭ ža».
