U vioscy Calevičy Słuckaha rajona nieviadomyja ŭ kamuflažnaj formie zastrelili busła, piša Jeŭraradyjo sa spasyłkaj na «Infa-kurjer».
kurjer.info
Zabituju ptušku pachavali na svaim harodzie dačniki Anatol i Taćciana Hreki. Jany chočuć, kab vinavatych pakarali štrafam, pazbavili palaŭničaha bileta i dali publičnuju vymovu.
Zdareńnie adbyłosia zranku 16 vieraśnia. Mima dačy siamji Hrek prajechali dźvie mašyny — Volkswagen Golf i Volkswagen Transporter. Jany jechali ŭ toj bok, kudy zvyčajna ludzi jeździać na palavańnie. Praz paru chvilin prahučali dva streły, jakim dačniki nie nadali vialikaha značeńnia.
Ale praź niekalki chvilinaŭ Anatol Hrek pabačyŭ u harodzie zabitaha busła. Nieviadomyja palaŭničyja prastrelili jamu łapu, šyju i śpinu. Takim čynam streł prahučaŭ za 30 mietraŭ ad vioski.
Susiedzi Hrekaŭ raspaviali, što ź mikraaŭtobusa vyjšaŭ čałaviek u kamuflažnaj formie i streliŭ. Čaćviora busłoŭ palacieli, adzin nie paśpieŭ. Dačniki nie zapomnili numaroŭ aŭtamabilaŭ, bo nie viedali, što tam jeduć palaŭničyja.
Milicyja pryniała ŭ dačnikaŭ zajavu. Taksama siamja Hrekaŭ paviedamiła pra incydent u Słucki lashas i płanuje prakansultavacca ŭ prakuratary, jak im dziejničać dalej.
Jak kamientuje dyrektar hramadskaj arhanizacyi «Achova ptušak Baćkaŭščyny» Alaksandr Vinčeŭski, bieły busieł znachodzicca pad achovaj zakona, i palavańnie na ich zabaronienaje. U ježu ich nie ŭžyvajuć. Akramia taho, zabaroniena stralać i znachodzicca z zaradžanaj palaŭničaj zbrojaj u nasielenych punktach i na adlehłaści mienš za 200 mietraŭ ad ich krajniaha budynka.
U Słuckim lashasie kažuć, što palaŭničym pahražaje niekalki pakarańniaŭ. Za zabituju ptušku, na jakuju zabaroniena palavańnie — štraf ad 10 da 50 bazavych vieličyniaŭ (230-1150 rubloŭ). Za palavańnie kala nasielenaha punktu — štraf da 30 bazavych vieličyniaŭ (690 rubloŭ) i pazbaŭleńnie prava palavańnia na try hady. Kali ŭ palaŭničych nie było pucioŭki i jany zajmalisia niezakonnym palavańniem, im moža pahražać navat kryminalnaja sprava.