U Pravaabarončy centr «Viasna» źviarnuŭsia Mikałaj Miakšyła, jaki byŭ asudžany da hoda abmiežavańnia voli za sprobu naniasieńnia nadpisu na pomnik Leninu ŭ Lidzie.
Małady čałaviek raspavioŭ, što ŭ sakaviku na pomnik byŭ naniesieny nadpis «Satana», ale kamunalnyja słužby jaho vycierli. U kancy krasavika Mikałaj Miakšyła vyrašyŭ, što treba nanieści nadpis na pomnik Leninu jašče raz. Źjaŭlajučysia viernikam, jon takim čynam chacieŭ vykazać svaju niazhodu z toj palitykaj, jakuju pravodziŭ Uładzimir Lenin u svoj čas u dačynieńni da relihii.
Uviečary ŭ adzin ź dzion, kali jon nabliziŭsia da pomnika i tolki chacieŭ pačać malavać, da jaho vybiehła niekalki supracoŭnikaŭ u cyvilnym, jakija skrucili chłopca, pavalili na hazon i pačali źbivać: pa nahach, śpinie, šyi i hałavie, — choć Mikałaj nie akazvaŭ nijakaha supracivu.
«U mianie pytalisia: chto zamoviŭ nadpis i kolki mnie zapłacili? Ci nie źjaŭlajusia ja arhanizataram niejkaha ruchu? Ale ja adkazvaŭ, što nie naležu ni da jakich ruchaŭ i nichto mnie nie płaciŭ, a dziejničaŭ ja pa asabistych pierakanańniach», — padkreśliŭ chłopiec.
U niejki momant źbićcio rezka spyniłasia, jak ličyć chłopiec, chtości z načalnikaŭ addaŭ zahad. Na rukach Mikałaja Miakšyła zaščapilisia kajdanki, jaho pasadzili ŭ śpiectranspart i dastavili ŭ RUUS.
«Mnie kazali, što ja zatrymany na troje sutak dla «prafiłaktyki», kab u mianie byŭ čas pieraasensavać zroblenaje. Ja raźličvaŭ, to daduć štraf u vyhladzie pakarańnia za maje dziejańni. Adnak praź niekalki dzion u «karmušku» kamiery padali papiery na podpis, a zatym pieraviali ŭ Hrodzienskaje SIZA, pradjaviŭšy abvinavačvańnie pa art. 339 Kryminalnaha kodeksu — «Chulihanstva», — raspavioŭ Mikałaj Miakšyła.
U domie maładoha čałavieka prajšoŭ pieratrus, byli kanfiskavanyja kampjutar, fłeški i inšyja nośbity infarmacyi.
Praz dva miesiacy śledčych dziejańniaŭ spravu pieradali ŭ sud. U pracesie prakuror zapatrabavaŭ adzin hod abmiežavańnia voli, i sud hetuju prośbu zadavoliŭ. Taksama Mikałaj Miakšyła adznačyŭ, što na druhim pasiadžeńni sud adnaviŭ śledčyja dziejańni: jaho staranna dapytvali, ci nie naležyć jon da niejkich palityčnych partyjaŭ ci ruchaŭ, jakich pohladaŭ prytrymlivajecca z metaj źviazać jaho indyvidualnyja dziejańni z apazicyjaj.
Małady čałaviek z dapamohaj pravaabaroncaŭ abskardziŭ rašeńnie suda, adnak Hrodzienski abłasny sud pakinuŭ skarhu biez zadavalnieńnia, a rašeńnie — bieź źmieny. Zaraz jon płanuje abskardzić rašeńnie suda ŭ paradku nahladu.
Juryst Pravaabarončaha centra «Viasna» Pavieł Sapiełka adznačaje, što dadzieny vypadak źjaŭlajecca vidavočnym parušeńniem svabody vykazvańnia mierkavańnia, bo reakcyja ŭładaŭ apynułasia całkam niepraparcyjnaj zroblenamu.
«Pakidajučy niavykazanyja mierkavańni pra asobu Lenina i zasiarodžvajučy ŭvahu tolki na pravavym składniku, nielha nie adznačyć vidavočna abvinavaŭčy ŭchił u acency dziejańniaŭ Mikałaja Miakšyła: u Kryminalnym kodeksie jość artykuł, jaki praduhledžvaje adkaznaść za naniasieńnie nadpisaŭ na budynkach i zbudavańniach; vidy i pamiery pakarańnia ŭ joj praduhledžanyja značna bolš miakkija; miera strymańnia ŭ vyhladzie zaklučeńnia pad vartu pa joj abrana praktyčna być nie moža.
Darečy, navat z abvinavačvańniem u ździajśnieńni chulihanstva miera strymańnia ŭ vyhladzie zaklučeńnia pad vartu ŭ dačynieńni da maładoha čałavieka, jakaja aznačała znachodžańnie da suda ŭ turmie h.Hrodna, — vidavočna nieadpaviednaja asobie abvinavačanaha i charaktary abvinavačvańnia.
Žorstkaje abychodžańnie ŭ pracesie zatrymańnia, jakoje było nie abumoŭlenaje procipraŭnym pavodzinami, supracivam supracoŭnikam pravaachoŭnych orhanaŭ, — taksama źjaŭlajecca parušeńniem asnoŭnych pravoŭ — prava nie padviarhacca žorstkamu, biesčałaviečnamu, źnievažalnamu abychodžańniu i katavańniam», — padkreśliŭ juryst.
