Prezident Turcyi Redžep Taip Erdahan zajaviŭ, što kali iracki Kurdystan abvieścić niezaležnaść paśla refierendumu, jaki prajšoŭ u paniadziełak, to jaho žycharam pahražaje hoład, paviedamlaje VVS.
Erdahan abvinavaciŭ lidara Irackaha Kurdystana Masuda Barzani ŭ «vierałomstvie», jakoje, na dumku tureckaha prezidenta, vyjaŭlałasia ŭ praviadzieńni hałasavańnia, niahledziačy na piarečańni mižnarodnaj supolnaści. Pa słovach tureckaha prezidenta, refierendum ab niezaležnaści Kurdystana «padtrymaŭ tolki Izrail».
Raniej prezident Turcyi nie vyklučyŭ taho, što Ankara pierakryje trubapravod, jaki pierapampoŭvaje ŭ port Džejchan naftu z terytoryi Irakskaha Kurdystana. Taksama Erdahan zajaviŭ, što Ankara moža pierastać prapuskać hruzaviki ź irakskaj naftaj praź miažu z Turcyjaj.
Ułady Turcyi aścierahajucca, što refierendum ab niezaležnaści Irakskaha Kurdystana padšturchnie sieparatysckija nastroi siarod tureckich kurdaŭ.
Vyniki hałasavańnia, jakoje adbyłosia 25 vieraśnia, jašče nie abvieščanyja, adnak, pavodle prahnozaŭ, bolšaść udzielnikaŭ hałasavańnia vykazalisia za niezaležnaść Kurdystana.
Lidary irakskich kurdaŭ padkreślivali, što nie majuć namieru nieadkładna abviaščać niezaležnaść Kurdystana navat u vypadku adpaviednaha vyniku refierendumu. Jany chočuć razhladać volevyjaŭleńnie kurdaŭ jak mandat dla pieramovaŭ ab stvareńni kurdskaj dziaržavy z uradam Iraka i z susiednimi krainami.
Premjer-ministr Iraka Chajder Abadzi nazvaŭ refierendum niezakonnym i niekanstytucyjnym.
Pradstaŭniki zachodnich krain zaniepakojenyja tym, što plebiscyt u irakskim Kurdystanie, jaki ŭklučaje ŭ siabie centr naftazdabyčy Kirkuk, moža adciahnuć uvahu ad baraćby z bajevikami hrupoŭki «Isłamskaja dziaržava».
Susiedzi Iraka — Turcyja, Iran i Siryja — vystupajuć suprać kurdskaha refierendumu, aścierahajučysia rostu sieparatysckich nastrojaŭ siarod kurdaŭ, jakija pražyvajuć na ich terytoryi.
Kiraŭnik Irakskaha Kurdystana Masud Barzani zajaŭlaŭ, što adkładać refierendum było niemahčyma: paśla mnohich hadoŭ uščamleńnia intaresaŭ kurdaŭ nastaŭ čas stvaryć niezaležnuju kurdskuju dziaržavu.
Refierendum pravodziŭsia ŭ troch nasielenych pieravažna kurdami pravincyjach na poŭnačy Iraka i na prylehłych da ich sprečnych terytoryjach, jakija znachodziacca pad kantrolem kurdskaha apałčeńnia, — na ich pretendujuć jak kurdskaja aŭtanomija, tak i centralny ŭrad Iraka.
Kurdy vystupajuć za stvareńnie ŭłasnaj dziaržavy z kanca Pieršaj suśvietnaj vajny.
Kurdy składajuć ad 15 da 20% 37-miljonnaha nasielnictva Iraka.
