26 vieraśnia 29-hadovaha Alaksieja Jaršova z Pastavaŭ pakarali 2 hadami «chatniaj chimii» pavodle č.1 art. 363-3 — udzieł u bajavych dziejańniach za miažoj. Pasiedžańnie prachodziła ŭ zakrytym režymie.
Jaršoŭ śćviardžaje, što ŭdzielničaŭ u vajnie na baku DNR z sakavika 2016 pa travień 2017 hodu. Na staroncy Alaksieja «Vkontaktie» raźmieščanyja fota z Danbasu, dzie jon paziruje sa zbrojaj.
Heta pieršy viadomy vypadak, kali asudzili biełarusa, jaki vajavaŭ za sieparatystaŭ.
Žurnalisty belsat.eu źviazalisia z eks-bajevikom, kab ź pieršych vusnaŭ daviedacca padrabiaznaści biesprecedentnaj dla Biełarusi spravy.
«Ja sam pryjšoŭ u KDB i pradstaviŭ usie dokazy»
— Kali i čamu vy vyrašyli pajechać na Danbas?
— U Pastavach ja pracavaŭ traktarystam, roznarabočym, a paśla zacikaviŭsia tym, što tam adbyvałasia. Hospadzi, ja ž ź ludźmi adtul śpisvaŭsia, jany pieradavali poŭnuju karcinu! Ja nie vieryŭ ŚMI, nie vieryŭ, kali pisali nibyta Danieck stralaje pa svaich ludziach. Hetak kažuć pradažnyja bałaboły. Našyja dziedy vajavali z fašyzmam i ja pajechaŭ. U sakaviku 2016 hoda.
— U jakoje padraździaleńnie patrapili?
— Vyviedka. Ale nie mahu skazać, vyviedka jakoha padraździaleńnia — heta sakretnaja infarmacyja. Ahułam pravioŭ na Danbasie hod i dva miesiacy.
— Pa viartańni ŭ Biełaruś vas adrazu zatrymali? Jakaja struktura pravodziła zatrymańnie?
— Spačatku ŭ mianie doma prajšli vobšuki, ničoha cikavaha nie znajšli. Potym vyklikali na dopyt. 31 traŭnia ja sam pryjšoŭ u Viciebski KDB na dopyt i mianie ŭziali pad vartu ŭ kabiniecie śledčaha. To bok usie prosta, nijakaj hrupy zachopu nie było. Spačatku ja byŭ źmieščany na dva dni ŭ izalatar časovaha ŭtrymańnia, a adtul užo pieraviali ŭ Viciebskaje SIZA №2. Usio SIZA tady hudzieła…
Sa śledstvam ja supracoŭničaŭ, usie dokazy sam pradstaviŭ. Addaŭ navat vajenny bilet DNR, jaho dałučyli da spravy. Ad kaho mnie biehać?
«Praktyčna ŭsie dadzienyja byli sakretnyja»
— Čamu sud prachodziŭ u zakrytym režymie?
— Sud byŭ zakryty, bo tam było šmat sakretnych dadzienych… Praktyčna ŭsie dadzienyja byli sakretnyja (jany tyčylisia jak pracy KDB, hetak i majej pajezdki) i nie musili atrymać rozhałas. Ale ja nie mahu šmat pra heta kazać, bo davaŭ padpisku…
— Jakoha pakarańnia dla vas zapatrabavaŭ na sudzie prakuror?
— Nie mahu pra heta raspavieści… Mahu tolki skazać, što jon patrabavaŭ miakkaha pakarańnia. To bok ja dobra razumieŭ, što paśla sudu mianie vyzvalać.
— Vy atrymlivali hrošy za ŭdzieł u bajavych dziejańniach? Zvyčajna šarahoŭcam «ŁDNR» płaciać pa 15 tysiač rasiejskich rubloŭ [kala $ 260].
— Ja viedaju, bačyŭ heta na Danbasie. Ale asabista ja nijakich hrošaŭ nie atrymlivaŭ, sumleńnie nie dazvalała.
— Ci źbirajeciesia vy viarnucca na Danbas i znoŭ vajavać za DNR?
— Nie mahu pakul skazać. Nie viedaju.
— Vy budziecie abskardžvać prysud?
— Nie. A navošta?
Dahetul publičnaj infarmacyi pra sudy nad biełarusami-bajevikami «DNR» nie było, chacia jašče minułym letam staršynia KDB Valery Vakulčyk zajaviŭ pra «138 spraŭ ab najmictvie».
Byli vypadki, kali karali biełarusaŭ, što vajavali na baku Ukrainy. Žychar Navapołacku Taras Avataraŭ atrymaŭ 5 hadoŭ turmy za niezakonny abarot i kantrabandu zbroi i vybuchoŭki, a žychara Viciebsku Stanisłava Hančarova, byłoha bajca bataljonu «Azoŭ», pakarali 7 hadami kałonii za złosnaje chulihanstva.
Dziasiatki biełarusaŭ, jakija prymali ŭdzieł u bajavych dziejańniach na baku sieparatystaŭ dahetul na svabodzie.
