Na strelbiščy ŭ horadzie Biełahorsk (Amurskaja vobłaść RF) vajskoviec adnoj z dysłakavanych u rehijonie voinskich čaściej rasstralaŭ dvuch sałdat i aficera, paraniŭ jašče adnaho kalehu, paśla čaho ŭciok razam z aŭtamatam i niekalkimi ražkami z patronami, paviedamlaje RBK sa spasyłkaj na administracyju Biełahorska.
«Pravaachoŭnyja orhany Biełahorska zaklikajuć biełaharodcaŭ da maksimalnaj aściarožnaści», — havorycca ŭ paviedamleńni haradskoj administracyi.
Pa daručeńni hubiernatara Amurskaj vobłaści Alaksandra Kazłova, u Biełahorsku ŭzmocnienaja achova škoł, balnic i administracyjnych budynkaŭ.
«Miery prymajucca ŭ metach paźbiahańnia situacyj, źviazanych z mahčymym zachopam zakładnikaŭ. U vypadku, kali ŭ bližejšy čas uciakač z zbrojaj nie budzie znojdzieny, usie ahulnaharadskija mierapryjemstvy, u tym liku prymierkavanyja da Dnia pažyłych ludziej, u Biełahorsku buduć admienienyja», — havorycca ŭ paviedamleńni administracyi.
U Minabarony patłumačyli, što pry praviadzieńni płanavych načnych strelbaŭ adzin z sałdat vypuściŭ čarhu z aŭtamata ŭ kirunku hrupy tych, chto čakaŭ vychadu na ahniavy rubiež, u vyniku čaho troje čałaviek zahinuli, a jašče dvoje byli paranienyja.
«U jakaści imaviernych pryčyn zdareńnia razhladajucca ŭsie viersii, uklučajučy niervovy zryŭ vajskoŭca», — skazali ŭ Minabarony.
Śledčy kamitet raspačaŭ kryminalnuju spravu pa art. 105 KK RF («Zabojstva»).
«U ciapierašni čas na miescy zdareńnia pracujuć vajennyja śledčyja, vyśviatlajucca matyvy i abstaviny taho, što adbyłosia, prymajucca miery dla ŭstanaŭleńnia miescaznachodžańnia i zatrymańnia vajskoŭca, jaki adkryŭ ahoń pa svaich kalehach», — havorycca ŭ paviedamleńni SK.
