Vialiki rezanans u internecie atrymała apublikavanaje Alaksiejem Vieniadziktavym fota mahiły Barysa Bierazoŭskaha. Apošni prytułak aliharcha na raźmieščanych u łondanskim pradmieści mohiłkach Brukvud ŭ hrafstvie Surej praz čatyry hady paśla śmierci Barysa Abramaviča vyhladaje zakinutym. «MK» źviarnuŭsia pa kamientary da administracyi anhlijskich mohiłak.
Na zdymkach vidać sapraŭdy ścipłuju mahiłku, pakrytuju zaviałaj travoj i ŭviančanuju draŭlanym kryžam z tabličkaj (na joj pa-anhlijsku napisanyja imiony niabožčyka — Barys Bierazoŭski i Płaton Jalenin — i pakazanaja data śmierci: 23 sakavika 2013 hoda). Zvykłaj dla mnohich zaharadki niama, jak niama i kamiennaha nadmahilla.
Nahadajem, što čatyry ź lišnim hady tamu aliharch, jaki źjechaŭ z Rasi,i byŭ znojdzieny niežyvym u začynienym znutry vannym pakoi ŭ domie, jaki naležyć jaho byłoj žoncy Halinie, u Askacie hrafstva Bierkšyr za 40 km ad Łondana. Kala jaho cieła znajšli šalik. 8 maja 2013 hoda Barys Bierazoŭski byŭ pachavany.
Mohiłki Brukvud (viadomyja taksama jak Łondanski niekropal) ličacca samymi vialikimi ŭ Vialikabrytanii i adnymi z najbujniejšych u Jeŭropie. Płošča ich składaje 202 hiektary, tut naličvajecca biez małoha čverć miljona pachavańniaŭ. Tak što nie dziŭna, što ŭ administracyi mohiłak pra stan mahiły Bierazoŭskaha-Jalenina nie mieli paniaćcia.
«Ja nie mahu adkazać na pytańnie, ci naviedvaje niechta hetuju mahiłu, — skazała surazmoŭnica. — Sprava ŭ tym, što ŭ nas tut tysiačy i tysiačy nadmahillaŭ i niemahčyma adsačyć naviedvalnikaŭ kožnaha. Kali b u vas byŭ numar hetaj mahiły, ja b mahła skazać, chto jaje ŭładalnik. Zvyčajna, kali nadmahille ŭstaloŭvajuć svajaki niabožčyka, jany dahladajuć jaho, a administracyja mohiłak kłapocicca ab prastory vakoł mahił. Kłopat ab familnych miemaryjałach nie ŭvachodzić u našy abaviazki, heta całkam kładziecca na plečy siamji. Tak što nie viedajučy, chto vałodaje mahiłaj — siamja, dziaržava ci niechta jašče — ja nie mahu ničoha skazać pra toje, chto padtrymlivaje na joj paradak…»
Zrešty, dastatkova pahladzieć na fatahrafii mnohich inšych mahił na mohiłkach Brukvud, u tym liku zaniesienych u śpisy histaryčnych pomnikaŭ, kab pierakanacca, što i jany nie robiać uražańnia dahledžanych. Naprykład, miesca spačynku hienierała sera Hienry Hołdfinča, pamierłaha ŭ 1854 hodzie. Zakinutym lohka nazvać i pachavańnie viadomaha mastaka «vydatnaj epochi» Džona Sinhiera Sardženta, pamierłaha ŭ 1925 hodzie. Tak što mahiła Bierazoŭskaha na hetym fonie niejkim vyklučeńniem nie vyhladaje.
