Nie atrymaŭšy hrošaj ad Mižnarodnaj finansavaj karparacyi i refinansavaŭšy abaviazacielstvy pierad kredytorami, hałoŭny retejler krainy płanuje znajści novyja krynicy resursaŭ u vyhladzie raźmiaščeńnia 5-hadovych jeŭraablihacyj na sumu 350 młn dalaraŭ.
Pra heta paviedamlajuć, u pryvatnaści, Reuters i Financial Times sa spasyłkaj na svaje krynicy. Pavodle infarmacyi ŚMI, sustrečy z patencyjnymi inviestarami z ZŠA i Jeŭropy pačnucca z nastupnaha tydnia. Arhanizatarami ździełki pryznačanyja JPMorgan, a taksama rasijskija banki «Śbierbank» i «Rieniesans Kapitał».
Nahadajem, što ŭ 2016 hodzie «Jeŭrahandal», jaki vałodaje najbujniejšaj roźničnaj sietkaj u Biełarusi («Jeŭraopt»), vioŭ pieramovy pra ŭvachodžańnie ŭ biznes Mižnarodnaj finansavaj karparacyi. Mierkavałasia, što IFC układzie ŭ statutny kapitał retejlera 55 młn dalaraŭ. Uvieś prajekt, jaki vynosiŭsia na zaćviardžeńnie rady dyrektaraŭ mižnarodnaj struktury, aceńvaŭsia ŭ 291 młn dalaraŭ, ź jakich 91 młn dalaraŭ pryznačaŭsia dla inviestycyj u pašyreńnie sietki i klijenckaj bazy, a 200 młn dalaraŭ — na refinansavańnie abaviazacielstvaŭ «Jeŭrahandlu».
Adnak «Jeŭrahandl» nie dačakaŭsia stanoŭčaha rašeńnia ad IFC. U pačatku 2017 hoda banki-kredytory i ŭłady vykazali zaniepakojenaść rostam zapazyčanaści apieratara. U krasaviku staršynia naziralnaj rady retejlera Andrej Zubkoŭ ahučyŭ, što «Jeŭrahandlu» ŭdałosia damovicca ab refinansavańni daŭhoŭ z klučavymi kredytorami («Alfa-Bankam», «BPS-Aščadbankam»), padpisaŭšy hrafiki pahašeńnia da 2022—2023 hadoŭ.
«U adpaviednaści z našymi płanami na 1 studzienia 2018 hoda doŭh pierad bankami składzie kala 580 młn dalaraŭ», — zajaŭlaŭ tady Andrej Zubkoŭ.
