president.gov.by
Alaksandr Łukašenka siońnia na pasiadžeńni ŭ vuzkim składzie Savieta kiraŭnikoŭ dziaržaŭ SND u Sočy raskrytykavaŭ dziejnaść Mižparłamienckaj asamblei SND.
Alaksandr Łukašenka raskazaŭ, što ŭžo paśpieŭ abmianiacca z prezidentam Kazachstana Nursułtanam Nazarbajevym mierkavańniem ab rabocie asobnych struktur SND, u pryvatnaści, Mižparłamienckaj asamblei. Jany miarkujuć, što dziejnaść hetaha orhana nie daje patrebnaj addačy, ale ž na jaje ŭtrymańnie vydzialajucca niemałyja hrošy.
«Kali hetaja struktura nie pracuje, moža być, i admovicca ad jaje? Choć my prapanoŭvali nadzialić jaje peŭnymi, kankretnymi paŭnamoctvami. My tam niejkija madelnyja zakony prymajem, ale nivodny ź ich, naprykład, u Biełarusi, nie loh u asnovu pryniaćcia nacyjanalnaha zakanadaŭstva. Takoha ŭ pryncypie nikoli nie było», - źviarnuŭ uvahu biełaruski lidar.
«Atrymlivajecca, što deputaty źbirajucca ŭ Piciery, byccam by niešta abmiarkoŭvajuć, kažuć. Ale navat my pra heta ničoha nie viedajem, bo heta nie zapatrabavana, — adznačyŭ Alaksandr Łukašenka. — Čynoŭnikaŭ płodzim nieźličonuju kolkaść, a tołku mała».
Kiraŭnik krainy padkreśliŭ, što da hetych pytańniaŭ nieabchodna padyści hruntoŭna. Bo navat na ŭzroŭni kiraŭnikoŭ dziaržaŭ razhladajucca nie samyja aktualnyja i nadzionnyja prablemy. «Ščyra kažučy, my i sami tut na vysokim uzroŭni prymajem rašeńni i nie zaŭsiody realizoŭvajem ich. Dy i rašeńni, pahladzicie, ci nie našaha ŭzroŭniu: niejkija zajavy i inšaje», - skazaŭ Alaksandr Łukašenka.
Na jaho dumku, bolš važnaja prablema handlova-ekanamičnaha ŭzajemadziejańnia, jakuju biełaruski bok padymaŭ nie raz, i biaśpieki.
«Pytańni biaśpieki - jany ŭžo nie stukajucca ŭ dźviery, jany ŭžo ŭ naš dom uvarvalisia. My ich abychodzim saramliva: nie toje my baimsia pastavić hetyja pytańni, nie toje razumiejem, što nie možam ich vyrašyć», — kanstatavaŭ biełaruski kiraŭnik.
«Robim vyhlad, što ŭsio ŭ nas dobra, źbirajemsia, zajavy robim, a pa sutnaści efiektyŭnaść vielmi nizkaja. Moža, nam niejak vyznačyć koła śpiecyjalistaŭ, jakija b abjektyŭna nam prapanavali surjoznuju reformu abo strukturyzacyi ŭ našaj dziejnaści?» - zapytaŭ kiraŭnik dziaržavy.
Padobnyja prablemy isnujuć i ŭ JEAES, adznačyŭ jon. Ale tam bolš kankretny paradak dnia i bolš kankretnyja rašeńni, pakolki značnaść sajuza vielmi vysokaja. «Ja b pahadziŭsia z tym, kab u JEAES było i parłamienckaje vymiareńnie, tamu što jość što tam abmiarkoŭvać. Treba ŭ prytomnaść pryvodzić našy postsavieckija struktury», — zajaviŭ Alaksandr Łukašenka. Jon vykazaŭ upeŭnienaść, što jaho pazicyju padtrymlivajuć kiraŭniki inšych krain.
***
Na telehram-kanał «Našaj Nivy» možna padpisacca tut.
