Na ŭčastku adkaznaści pamiežnaj zastavy «Maładziečanskaja» na litoŭskim kirunku dziažurny z dapamohaj intehravanaj sistemy achovy miažy zafiksavaŭ niezvyčajnaha parušalnika, paviedamlajecca na sajcie DPK.
«Niahledziačy na toje, što na asnoŭnych ściežkach mihracyi žyvioł u sihnalizacyjnaj sistemie aharodžy praduhledžanyja śpiecyjalnyja łazy dla bieśpieraškodnaha pieramiaščeńnia lasnych žycharoŭ, zaharadžalny płot na tryvałaść pravieryŭ łoś. Caru lasnoha huščaru terminova spatrebiłasia pierajści ŭ bok susiedniaj krainy. Nie vyklučana, što «parušalnik biez dakumientaŭ» sabraŭsia na vadapoj na bližejšuju raku Vilija. Mienavita pa joj u hetym rajonie i prachodzić dziaržaŭnaja miaža pamiž Biełaruśsiu i Litvoj», — raspaviali ŭ viedamstvie.
Charakterna, što štučny intelekt intehravanaj sistemy achovy miažy praanalizavaŭ charaktar pieraadoleńnia i nie padaŭ sihnał tryvohi na zastavu, biespamyłkova vyklučyŭšy ŭździejańnie čałavieka. Smarhonskija pamiežniki z dapamohaj kamier sačyli za rašučymi dziejańniami «parušalnika», dla jakoha dvuchmietrovaja aharodža nie stała surjoznaj pieraškodaj na šlachu.
