Usiaho na ŭliku ŭ Barysaŭskim RUUS znachodziacca 52 žančyny, jakija akazvali seksualnyja pasłuhi za ŭznaharodžańnie.
Padpałkoŭnik milicyi Ihar Paźniakoŭ raspavioŭ haziecie «Adzinstva» padrabiaznaści pra žančyn, jakija zarablajuć na žyćcio seks-pasłuhami.
Siaredni ŭzrost — 25-30 hadoŭ, niezamužnija, biespracoŭnyja, časam užyvajuć narkotyki, niaredka žyvuć z raniej sudzimymi mužčynami.
«Najbolš častymi adkazami na pytańnie, što zmušaje handlavać svaim ciełam, stanoviacca nastupnyja: «Pracuju ad biezvychodnaści», «Biadotnaje stanovišča ŭ siamji», «Treba karmić dziaciej». Ale, jak pakazvaje praktyka, heta chłuśnia, a praŭdzivy matyŭ składajecca ŭ niežadańni pracavać», — kaža Paźniakoŭ.
Čaściej za ŭsio prastytutak možna sustreć na trasach i zapraŭkach, a pasłuhami u asnoŭnym, karystajucca dalnabojščyki. Pryčym narkazaležnyja žančyny, jak praviła, źjaŭlajucca nośbitami virusu hiepatytu S, padkreślivajuć milicyjanty.
Zaniatak prastytucyjaj karajecca štrafam ad 6 da 20 bazavych vieličyń abo administracyjnym aryštam. Toje ž dziejańnie, učynienaje paŭtorna na praciahu hoda paśla administracyjnaha spahnańnia, karajecca štrafam ad 30 da 50 bazavych vieličyń abo iznoŭ ža aryštam. Adnak štrafy i aryšty tolki prypyniajuć nienadoŭha «pracoŭnuju dziejnaść» žančyn i asabliva nie ŭpłyvajuć na ich pavodziny ŭ dalejšym, kaža milicyjant.
«Byvaje, dziejazdolnyja žančyny, jakija nie chočuć pracavać, pryśviačajuć hetamu haniebnamu zaniatku dziasiatki hadoŭ, — raspaviadaje Paźniakoŭ. — Naprykład, adna ź ciapierašnich padulikovych, jakaja vyrasła ŭ paśpiachovaj siamji, adnojčy apynułasia ŭ drennaj kampanii i pačała ŭžyvać narkotyki. U dziaŭčyny źjaviłasia štodzionnaja patreba ŭ hrošach, a ludzi, što pasadzili jaje na ihołku, padkazali, dzie ich možna chutka zarabić. Prajšło šmat hadoŭ, ale žančyna tak i nie źmianiła svoj ład žyćcia, niahledziačy na šmatlikija zakliki parvać ź minułym».
Cikava, što pa słovach milicyi, miascovyja prastytutki «vybirajuć dla siabie zručny hrafik i čaściej pracujuć u dzionny čas».
