Siarhiej Dalidovič praz try hady paśla Alimpijady ŭ Sočy staŭ pryzioram łyžnaj honki na 50 kiłamietraŭ. Na spabornictvach jon byŭ piatym, ale paśla dyskvalifikacyi rasiejcaŭ, jakija zaniali pieršyja miescy, Dalidovič uźniaŭsia na treciaje miesca.
Ale ž akramia prestyžu, pieršaja trojka pryzioraŭ atrymlivaje ad dziaržavy jašče i salidnuju sumu hrošaj. Bronzavyja miedali Alimpijady aceńvajucca ŭ 50 tysiač dalaraŭ. Mienavita takuju sumu vypłočvajuć biełaruskim spartoŭcam. Ale ci atrymaje ich Dalidovič siońnia, praz 3 hady paśla spabornictvaŭ?
Alaksandr Najdzin, pamočnik ministra sportu, paviedamiŭ «Našaj Nivie», što pakul rana havaryć pra hrošy — treba pačakać aficyjnaha rašeńnia.
Toje ž samaje paviedamiŭ i Uładzimir Nieściarovič, pres-sakratar Ministerstva sportu i turyzmu.
«Situacyja składanaja. Treba budzie vyvučać usie padstavy. Pytańnie treba vyrašać kompleksna. Ciapier pytańnie prapracoŭvajecca na zakanadaŭčym uzroŭni, u tym liku i viartańnie spartsmienam hrošaj dziaržavie, kali spartsmiena złavili na dopinhu. Rychtujecca heta ŭ vyhladzie dekreta ab baraćbie z dopinham. Projdzie ci nie — pahladzim, — raspavioŭ Nieściarovič. — Što tyčycca hrošaj za bronzu Dalidoviča, to sapraŭdy, kazać pra heta pakul rana. Ale ŭ minułych vypadkach biełarusam, jakija atrymlivali miedali paśla dyskvalifikacyi supiernikaŭ, hrašovyja vypłaty za pryzavyja miescy nie davali. Taksama, hrošy nie zabirali ŭ tych, chto byŭ dyskvalifikavany praź niejki čas paśla spabornictvaŭ».
