AP
Ułady Rasii robiać usio nieabchodnaje dla abarony intaresaŭ rasijskich spartoŭcaŭ, zapeŭniŭ pres-sakratar prezidenta krainy Dźmitryj Piaskoŭ. Jon taksama źviarnuŭ uvahu na niedapuščalnaść «niepradumanych dziejańniaŭ, bo situacyja zastajecca składanaj.
«Jość prychilniki nahniatańnia situacyi i vykarystańnia jaje dla dalejšaha raskručvańnia antyrasiejskaha machavika», — skazaŭ Piaskoŭ na prośbu prakamientavać publikacyju ŭ amierykanskaj presie vytrymak ź dziońnika byłoha kiraŭnika Maskoŭskaj antydopinhavaj łabaratoryi, a ciapier infarmatara WADA Ryhora Rodčankava.
Nazvaŭšy Rodčankava «adyjoznaj fihuraj», Piaskoŭ nahadaŭ, što ŭ Rasii jon abvinavačvajecca ŭ «naviazvańni dopinhu spartsmienam».
«Da hetych abvinavačvańniaŭ jaho zastupniki i jaho ŭkryvacieli nie prysłuchoŭvajucca i nie demanstrujuć nijakaj cikavaści. Situacyja zastajecca składanaj i hałoŭnaje što pakutujuć intaresy našych spartsmienaŭ, — skazaŭ Piaskoŭ, — Kamu heta vyhadna, taksama vidavočna»
Pres-sakratar kiraŭnika dziaržavy padkreśliŭ, što Pucin paśladoŭna prytrymlivajecca linii «na niedapuščalnaść jakich-niebudź prajavaŭ simpatyjaŭ da dopinhu, na nieprymalnaść dopinhu jak takoha».
28 listapada hazeta The New York Times apublikavała vytrymki ź dziońnika Rodčankava, dzie, u pryvatnaści, apisvajucca jaho sustrečy z tahačasnym ministram sportu Vitalom Mutko, jaho byłym namieśnikam Juryjem Nahornych i Irynaj Radzivonavaj, byłym dyrektaram Centra spartyŭnaj padrychtoŭki zbornych kamand Rasii.
Havorka tam idzie taksama ab stvareńni dopinhavaha kaktejlu - sumiesi troch anabaličnych steroidaŭ i viermutu — jaki atrymaŭ mianušku «Dziušes» i zbory i transparciroŭcy «sotniaŭ uncyj čystaj mačy, jakija atlety miesiacami źbirali ŭ słoički.
U adkaz na prośbu prakamientavać publikacyju NYT, Vital Mutko, jaki ciapier zajmaje pasadu vice-premjera, skazaŭ RBK, što ŭ jaho «niama času čytać» materyjał.