Kampanija «Enierha-Oił» Alaksieja Aleksina zojmiecca stvareńniem adzinaj tavarapravodnaj sietki, jakaja budzie pradavać tytuniovuju pradukcyju jak na ŭnutranym rynku, tak i na źniešnim, paviedamlaje Tut.by.
Alaksiej Aleksin (sprava). Fota: skrynšot videa infarmacyjnaha ahienctva BIEŁTA
Pavodle słovaŭ vice-premjera Michaiła Rusaha, «Enierha-Oił» inviestuje ŭ prajekt 122 młn rubloŭ i pavialičyć mahutnaści Hrodzienskaj tytuniovaj fabryki. U pryvatnaści, kampanija pastavić na «Nioman» jašče dźvie linii — kožnaja koštam pa 10 młn dalaraŭ.
Adznačajecca, što pa samych minimalnych raźlikach realizacyja prajekta za čatyry hady pryniasie 205-210 młn rubloŭ dadatkovych pastupleńniaŭ u biudžet, a patencyjna — da 400 młn.
«Narmatyŭny dakumient budzie padrychtavany, kab sa studzienia 2018 hoda hety prajekt pačaŭ nie revalucyjna, a paetapna raźvivacca. Zavieršycca jon na pieršym etapie ŭ 2020 hodzie. Dalej budziem hladzieć. Choć my ŭsie hetyja pytańni budziem supravadžać, — raspavioŭ vice-premjer. — Heta surjozny krok da taho, kab u takija śfiery ŭvachodziŭ i biznes. Ale kantrol dziaržavy budzie vielmi surjozny ŭ lubym vypadku».
Michaił Rusy rastłumačyŭ, što ŭ apošni čas za miažoj značna ŭzros popyt na pradukcyju biełaruskaj tytuniovaj haliny. Vytvorčaść zadziejničanaja ŭ kruhłasutkavym režymie, ale pastavić na ekspart patrabavany abjom cyharet, nie ahaliŭšy ŭnutrany rynak, u ciapierašni čas nie ŭjaŭlajecca mahčymym.
Havoračy ŭ cełym ab realizacyi prajekta z udziełam pryvatnaha inviestara, vice-premjer padkreśliŭ, što hałoŭnaje tut — zachavańnie kantrolu za realizacyjaj tytuniovaj pradukcyi, paŭnata vykanańnia biudžetu, vyklučeńnie šeraha impartu, adzinaja cenavaja palityka, a taksama novyja pracoŭnyja miescy.
Pa vynikach 2017 hoda biudžet papoŭnicca ad tytuniovych akcyzaŭ na 1 młrd rubloŭ. Adnak jak dakłali kiraŭniku dziaržavy biźniesmieny, «patencyjał biełaruskaj tytuniovaj haliny daloka nie vyčarpany». Jość mahčymaść pavialičyć pastaŭki na ekspart i takim čynam jašče bolš naraścić pastupleńni ŭ biudžet.
«Da mianie navat u apošni čas źviarnulisia zamiežnyja pradprymalniki pra toje, što našy pradpryjemstvy nie chočuć pradavać pradukcyju na ekspart. Jość vialikija nišy, navat u Jeŭrapiejskim sajuzie. Jany nam vyhadnyja. Čamu my nie chočam ich zapaŭniać? — adznačyŭ kiraŭnik dziaržavy. — Havorka idzie pra adnu sa značnych krynic papaŭnieńnia biudžetu».
Raniej krynicy TUT.BY u tytuniovaj halinie kazali, što Aleksin moža ŭziać u arendu kijoski «Tytuń», jakija raźvivaje Hrodzienskaja tytuniovaja fabryka. Pavodle sajta kampanii, pa stanie na kastryčnik HTF naležała 585 handlova-modulnych kropak. U vieraśni «Nioman» abviaściŭ tender na kuplu 80 kijoskaŭ na sumu za 1,1 młn rubloŭ.
Były hałoŭny śpiecyjalist departamienta enierharesursaŭ i naftapraduktaŭ kampanii «Biełźniešhandljinviest», jakaja ŭvachodziła ŭ skład Kiraŭnictva spravami prezidenta Biełarusi, Alaksiej Aleksin raniej byŭ partnioram Juryja Čyža. Adnak u 2012 hodzie ich šlachi razyšlisia. Zaraz intaresy biźniesmiena skancentravanyja na handli naftapraduktami, bankaŭskaj śfiery (MTBank), vytvorčaści miasnych vyrabaŭ («Viales-Mit»), deviełapmiencie, łahistycy i restarannym biznesie.
Jeŭrazijskaja antytytuniovaja kaalicyja niadaŭna napisała list premjer-ministru Rasii Dźmitryju Miadźviedzievu, u jakim prasiła davieści akcyzy na tytuniovyja vyraby ŭ RF da siaredniejeŭrapiejskaha ŭzroŭniu. U vypadku padtrymki dadzienaj inicyjatyvy košt adnaho pačka cyharet u Maskvie budzie składać nie mienš za 2 jeŭra, što moža surjozna stymulavać popyt na biełaruskija tytuniovyja vyraby ŭ Rasii.
