Alaksandr Łukašenka prapanoŭvaje Kurskaj vobłaści Rasii aktyvizacyju ŭzajemadziejańnia ŭ pramysłovaści, sielskaj haspadarcy i budaŭnictvie. Pra heta jon zajaviŭ siońnia na sustrečy z hubiernataram Kurskaj vobłaści Alaksandram Michajłavym, pieradaje BIEŁTA.

Łukašenka padkreśliŭ, što Kurskaja vobłaść — nadziejny partnior Biełarusi, a čarhovy vizit kiraŭnika rehijonu biełaruski bok razhladaje jak śviedčańnie ščyraj zacikaŭlenaści ŭ raźvićci dvuchbakovaha supracoŭnictva.

U jakaści adnaho ź pierśpiektyŭnych napramkaŭ supracoŭnictva Alaksandr Łukašenka nazvaŭ asnaščeńnie Michajłaŭskaha horna-ŭzbahačalnaha kambinata — adnaho z najbujniejšych u Rasii i SND pa zdabyčy i ŭzbahačeńni žaleznaj rudy — biełaruskaj karjernaj technikaj BiełAZ. «My zacikaŭlenyja ŭ praciahu hetaj pracy», — skazaŭ jon.

«U składzie vašaj delehacyi kiraŭniki bujnych pradpryjemstvaŭ rehijonu, zacikaŭlenych va ŭmacavańni supracoŭnictva z AAT «Płanar», Minskim matornym zavodam. Dumaju, što takoje ŭzajemadziejańnie dazvolić sumiesna vyjści na vytvorčaść vysokatechnałahičnaj pradukcyi suśvietnaha ŭzroŭniu», — zajaviŭ Łukašenka.

Jon adznačyŭ, što Kurskaja vobłaść dabiłasia značnych pośpiechaŭ u sielskaj haspadarcy, i Biełaruś mahła b spryjać dalejšamu raźvićciu hetaj haliny ŭ rehijonie. «U nas vyrablajecca šyroki śpiektr sielskahaspadarčaj techniki, my ŭmiejem budavać kompleksy dla sielskaj haspadarki z abstalavańniem «pad kluč», — skazaŭ kiraŭnik dziaržavy.

Alaksandr Łukašenka ličyć metazhodnym abmierkavać pierśpiektyvy supracoŭnictva pa pastaŭkach elitnaha nasieńnia zbožžavych i aharodninnych kultur, minieralnych uhnajeńniaŭ.

«My adkrytyja dla supracoŭnictva i hatovy zrabić usio, na što my zdolnyja. Usio, što my ŭmiejem, vy viedajecie. U tym liku i žyllovaje budaŭnictva — majem vopyt Mazyrskaha domabudaŭničaha kambinata, jaki buduje ŭ vas damy. Na 2018 hod jość kantrakt pa budaŭnictvie doma, — adznačyŭ kiraŭnik dziaržavy. — Kali patrebna tut bolšaja intensifikacyja, abjomy, my hatovyja razhledzieć i padklučyć inšyja trasty. Biełaruś maje mahutnaści, jakija siońnia nie zadziejničanyja, dobrych śpiecyjalistaŭ. My zacikaŭleny, kab jany pracavali, i kali ŭ Rasii, dyk pažadana kab svaimi kalektyvami».

Alaksandr Łukašenka prapanuje ŭ pierśpiektyvie zaprašać biełaruskich śpiecyjalistaŭ da budaŭnictva AES u Kurskaj vobłaści Rasii.

«Mianie pryjemna ździviła prapanova našych śpiecyjalistaŭ pra toje, što litaralna ŭ nastupnym hodzie ci praz hod jany zmohuć udzielničać u budaŭnictvie vašaj atamnaj stancyi, — skazaŭ Łukašenka. — Kali budzie nieabchodna, my hatovyja ŭ hetaj častcy pracavać razam z rasiejcami».

Łukašenka adznačyŭ, što na hety kont byli i damoŭlenaści z «Rasatamam», što biełaruskija śpiecyjalisty pavinny navučycca vykonvać asnoŭnyja raboty pa budaŭnictvie AES, a paśla zmohuć pryciahvacca da ŭdziełu ŭ realizacyi anałahičnych prajektaŭ u Rasii i inšych krainach.

Alaksandr Łukašenka ŭpeŭnieny, što heta sustreča daść mahčymaść umacavać partniorskija suviazi, jakija ŭ Biełarusi sapraŭdy šanujuć. «Sumiesnymi namahańniami my zmožam damahčysia tych žadanych vynikaŭ i tych rubiažoŭ, jakija my pierad saboj pastavim», — dadaŭ jon.

U studzieni—vieraśni 2017 hoda tavaraabarot Biełarusi z Kurskaj vobłaściu skłaŭ $96,3 miljona dalaraŭ i ŭ paraŭnańni z anałahičnym pieryjadam 2016 hoda pavialičyŭsia na 40,5%. Asnovu biełaruskaha ekspartu skłali pastaŭki šyn, kalijnych uhnajeńniaŭ, sintetyčnych nitak, hruzavych aŭtamabilaŭ, abutku.

Клас
Панылы сорам
Ха-ха
Ого
Сумна
Абуральна