AP
Były karol Rumynii Michaj I pamior u aŭtorak u svajoj šviejcarskaj rezidencyi va ŭzroście 96 hadoŭ.
U sakaviku 2016 hoda ŭ eks-manarcha było vyjaŭlena ankałahičnaje zachvorvańnie. Michaj pieranios chirurhičnaje ŭmiašańnie i pakinuŭ hramadskaje žyćcio. Zachavalnikam karony była pryznačanaja jahonaja starejšaja dačka Marharyta.
Michaj dvojčy zajmaŭ tron Rumynii, pieršy raz uzyšoŭšy na jaho ŭ 1927 h. va ŭzroście piaci hadoŭ: jon atrymaŭ u spadčynu tron paśla svajho dzieda Fierdynanda I. Adnak u 1930 h. Michaja skinuŭ jaho baćka Karal II, jaki pry žyćci Fierdynanda admoviŭsia ad tronu.
Ciaham dziesiaci hadoŭ Michaj ličyŭsia spadčyńnikam svajho baćki, jaki trymaŭsia, darečy, brytanskich pazicyj. Adnak u 1940 hodzie ŭ Rumynii adbyŭsia dziaržaŭny pieravarot, i faktyčnym kiraŭnikom krainy staŭ maršał Ion Antaniesku, a Michaj choć i zaniaŭ tron, ale realnaj ułady nie mieŭ. Rumynija ŭstupiła ŭ vajnu na baku Niamieččyny.
Paśla razhromu niamieckich vojskaŭ u Jaska-Kišynioŭskaj apieracyi Savieckaja armija vyjšła na miežy Rumynii.U hety momant Michaj I sam zładziŭ pieravarot, zahadaŭ aryštavać Antaniesku i abviaściŭ vajnu Hiermanii, z hetaha momantu i da kanca vajny rumynskija vojski vajavali suprać niemcaŭ i vienhraŭ na baku SSSR.
Uradam Rumynii ŭ hety čas kiravaŭ antyfašyst Pietru Hrozu, jaki simpatyzavaŭ kamunistam, a 23-hadovy Michaj zastavaŭsia karalom krainy, što pastupova pieratvarałasia ŭ sacyjalistyčnuju respubliku, i navat atrymaŭ mianušku «karol-kamsamolec». 6 lipienia 1945 hoda jon byŭ uznaharodžany najvyšejšym savieckim vajennym ordenam «Pieramoha», staŭšy adnym z 17 čałaviek, udastojenych hetaj uznaharody.
U 1947 hodu Michaj adroksia ad pasady, pazbaviŭšysia trona apošnim z manarchaŭ troch uschodniejeŭrapiejskich dziaržaŭ, jakija apynulisia paśla vajny ŭ śfiery ŭpłyvu SSSR (paśla karala Juhasłavii Piatra II i cara Bałharyi Simieona II). Pasialiŭšysia ŭ Šviejcaryi, Michaj pryniaŭ hramadzianstva hetaj krainy pad imiem Michaił fon Hohiencolern-Zihmarynhien i viarnuŭsia ŭ Rumyniju tolki ŭ 1992 hodzie.
