Biełaruskaja fiederacyja futboła pieraniesła padviadzieńnie vynikaŭ futbolnaha siezona na bolš poźni termin. Zacikaŭlenyja baki ŭ čarhovy raz majuć namier asprečyć rašeńnie pa spravie Vieramko. Čempijonstva BATE zastajecca pad pytańniem, paviedamlaje Tut.by.
Zacikaŭlenyja baki asprečać rašeńnie vykankama Biełaruskaj fiederacyi futboła ad 23 listapada 2017 hoda ŭ «spravie Vieramko». Takim čynam, mahčymy pierahlad vynikaŭ futbolnaha siezona-2017 i čempijonstva BATE. Aficyjnaja cyrymonija «Załaty miač — 2017», jakaja pavinna była adbycca ŭ najbližejšyja vychodnyja, projdzie paźniej.
Nahadajem, 10 listapada apielacyjny kamitet viarnuŭ BATE try ački, jakich barysaŭski kłub byŭ pazbaŭleny rašeńniem dyscyplinarnaha kamiteta paśla bujnoj pieramohi nad «Słuckam» (6:0).
BATE byŭ pryznany vinavatym u niepravamiernaj zajaŭcy na hulniu sa «Słuckam» zapasnoha hałkipiera Siarhieja Vieramko i pakarany štrafam u dźvie tysiačy bazavych vieličyń (46 tysiač rubloŭ).
Praz tydzień paśla razhladu skarhi BATE pa «spravie Vieramko» apielacyjny kamitet apublikavaŭ matyvavalnuju častku rašeńnia. U joj padrabiazna tłumačycca, čamu admienieny vierdykt dyscyplinarnaha kamiteta.
23 listapada ŭ Domie futboła adbyłosia pazačarhovaje pasiadžeńnie vykankama Biełaruskaj fiederacyi futboła. Inicyjatarami vystupili kłuby, jakija zmahalisia za čempijonstva. Na pasiadžeńni byŭ ahučany dakład staršyni Apielacyjnaha kamiteta ABFF Alaksandra Nazarava pa skandalnaj «spravie Vieramko».
Infarmacyja była «zasłuchanaja i pryniataja da viedama členami vykankama». Nijakich rašeńniaŭ pa hetaj spravie vykankam ABFF nie prymaŭ.
26 listapada ŭ dramatyčnym matčy BATE vyrvaŭ ničyju ŭ «Haradziei» i za košt pieramoh u asabistych sustrečach abyšoŭ minskaje «Dynama» ŭ baraćbie za pieršaje miesca ŭ čempijanacie Biełarusi.
