Piva pad nazvaj «2018» stali padavać u restaranie People's 14 śniežnia. Na etykietcy namalavany alimpijski miadźviedź uzoru 1980 hoda, jaki pakazvaje kułak, a podpis kaža: «Rasija, napierad!»
Pivavary tak acharaktarazavali novy hatunak: «Vy skažacie: čarhovy chajp ad Taler?! I jon taksama! Nam nieabyjakavy los rasijskich spartoŭcaŭ, jakija nie mohuć vystupać pad svaim ściaham i himnam na Alimpijadzie-2018 u Karei! Rasija — vielizarnaja, niepieramožnaja kraina! Mocnaja, mahutnaja! Bieź jaje Alimpijada — tak sabie vidovišča! My padtrymlivajem Rasiju mahutnym i sakavitym hatunkam u styli Hazy IPA «2018».
U sacyjalnych sietkach «Talera» idzie šmat niehatyŭnych vodhukaŭ za taki nejminh.
Reakcyja ŭ instahramie «Talera».
Čamu ž brovar pajšoŭ na taki krok? Pra heta my raspytalisia ŭ dyrektara pivavarni Ihara Drypsiaka i jahonaj namieśnicy Vieraniki Hurynavaj.
«Siadzieli na kuchni ź siabrami, šukali novuju nazvu. Abmiarkoŭvali, što rasijskija spartsmieny šmat hadoŭ rychtavalisia da hetaj Alimpijady, a ciapier nie majuć mahčymaści na jaje pajechać. Siabry kažuć: padtrymajcie Rasiju, kali takaja situacyja. Naša hałoŭnaja kaštoŭnaść i praviła — my za spraviadlivaść. My ličym, što niejkija palityčnyja hulni — heta niaščyra ŭ dačynieńni da spartsmienaŭ», — kaža Ihar Drypsiak.
Ihar Drypsiak. Fota z vk.com.
«My nie vielmi mocna razumiejem situacyju, my pa-za palitykaj, my za spraviadlivaść», — paćviardžaje jahonyja słovy Vieranika.
Ci viedali ŭ brovary, što reakcyja moža być niehatyŭnaj? «My viedali, što budzie reakcyja. Chtości nie lubić Rasiju, chtości — lubić. My lubim, my padtrymlivajem rasijskich spartsmienaŭ. Nam škada, što jany stali pieškami ŭ hetaj palityčnaj hulni. Toje ž «Jeŭrabačańnie» vaźmicie. Heta było spačatku, ciapier voś Alimpijada. Dla nas heta dziŭna, tamu i vypuścili taki hatunak», — tłumačyć spadarynia Hurynava.
A ci majuć pivavary sami niejkaje dačynieńnie da Rasii? «Nie! My lubim našu krainu», — u adzin hołas adkazvajuć jany.
Čamu padtrymka tyčycca Rasii, moža, varta było b padtrymać niejak Darju Domračavu ci frystajlistaŭ, jakija buduć zmahacca za biełaruskija ŭznaharody?
«My dumali nastupnaje niešta zrabić, źviazanaje ź bijatłonam. My nie źbirajemsia pradavać na rasijski rynak. My vypuścili adnu tonu piva — heta naš taki kryk dušy ŭ padtrymku atletaŭ. My za toje, kab Rasija vystupała pad svaim ściaham», — tłumačyć Vieranika.
Vieranika Hurynava. Fota vk.com.
«Kožny bačyć situacyju pad svaim vuhłom», — havoryć Ihar. «Mierkavańni byvajuć roznyja. Usim padabacca nie budzieš», — praciahvaje Vieranika.
U pryncypie, pivavarnia zvykłasia, što svaimi nieadnaznačnymi nazvami moža sparadzić sprečki i dyskusii. «Z «Sabčak» taksama byŭ niehatyŭ. Z «Žaleznym Fieliksam» byŭ. Siońnia my nazyvajem piva tak, a zaŭtra z zadavalnieńniem možam nazvać u honar Darji Domračavaj. Kaliści na «Sabčak» nam skazali, što my vyrašyli padlizać Rasii, što nam zapłacili. Ale heta ŭsio tryźnieńnie. Horš było b, kab ludzi nijak nie reahavali», — kažuć na brovary.
Nie admaŭlajuć jany i kamiercyjny składnik takoj nazvy. «Kaniečnie, heta i markietynhavy chod. Chacia heta nie tolki chajp, ale čałaviečyja adnosiny», — praciahvaje Ihar.
«My nie leziem u palityku. Ja ŭvohule dziaŭčyna, ja liču, što dziaŭčynie nie miesca ŭ palitycy», — u čarhovy raz padkreśliła Vieranika.
Dyk čamu «Taler» nie źviartajecca da biełaruskich temaŭ u naźvie piva? Niaŭžo na radzimie mała hierojaŭ?
«Chočam nazvać i ŭ honar biełarusaŭ. Kali viedajecie hierojaŭ, to pišycie na sajcie. My nazaviem», — prapanoŭvaje Vieranika. «Tolki niejtralnych!» - imhnienna reahuje Ihar. Niejtralnych — heta kaho? «Jakub Kołas, kali łaska, Janka Kupała, Vasil Bykaŭ, usich my ich viedajem z školnaj prahramy. Heta ahulnapryznany honar našaj krainy», — havoryć Drypsiak. «Navat taja ž Aleksijevič, jakaja ŭziała Nobiel. My za svaju krainu, chočam, kab my pieramahali paŭsiul», — reahuje Vieranika.
Raniej brovar nazyvaŭ svajo piva ŭ honar Donalda Trampa. «Było modna pra Trampa havaryć, my tady taksama zahavaryli. Heta nie značyć, što kahości padtrymlivajem. Toje samaje i pra Sabčak», — kaža dyrektar.
«My mienš za ŭsio chočam kahości pakryŭdzić, pačać niejkija batły», — praciahvaje jahonyja słovy namieśnica.
Hałoŭnaj svajoj metaj pivavary bačać nastupnaje: «My chočam, kab ludzi raźvivali svaje smakavyja jakaści. Chočam papularyzavać kraftavy ruch, kab ludzi kaštavali novyja hatunki. Kab viedali, što jość nie tolki śvietłaje i ciomnaje, ale i toje ž IPA», — zakančvaje razmovu Ihar.
***
Na telehram-kanał «Našaj Nivy» možna padpisacca tut.
