Litoŭski Centr acenki jakaści navučańnia niehatyŭna rasceńvaje dziejnaść Jeŭrapiejskaha humanitarnaha ŭniviersiteta. Takaja acenka moža słužyć padstavaj dla adklikańnia licenzii na praviadzieńnie navučańnia i źviazanaj z hetym dziejnaści, paviedamiŭ u piatnicu Centr.
Heta rašeńnie EHU moža na praciahu 14 dzion abskardzić sfarmiravanaj ministram adukacyi i navuki kamisii, a ŭ 30-dzionny termin — abskardzić u sudzie.
U 2014 h. EHU taksama byŭ acenieny niehatyŭna, u suviazi z čym licenzija była padoŭžana tolki na try hady. U novaj spravazdačy niehatyŭnuju acenku atrymali stratehičnaje kiravańnie EHU, jaho navukovaja i (abo) mastackaja dziejnaść.
Na minułym tydni Centr zajaviŭ ab paŭtornaj niehatyŭnaj acency Litoŭskaha ŭniviersiteta edukałohii. Kiraŭnictva rady EHU nie zhodnaje z vysnovami ab admoŭnaj instytucyjnaj acency ŭniviersiteta.
Na dumku EHU, reformy, ažyćcioŭlenyja va ŭniviersitecie ŭ 2015-2017 hadach, zabiaśpiečyli istotnaje raźvićcio stratehičnaha kiravańnia, navučalnaj i navukovaj dziejnaści, što było pryznana donarami padčas donarskaj kanfierencyi ŭ listapadzie 2017 hoda.
U apublikavanaj na sajcie aficyjnaj zajavie ŭniviersiteta havorycca, što budučy adzinym u śviecie ŭniviersitetam u vyhnańni, EHU źviedaŭ značnyja reformy stratehičnaha kiravańnia, a taksama ukaraniŭ novy Stratehičny płan na 2016-2021 hady.
Stratehičny płan byŭ raspracavany ŭ ciesnym uzajemadziejańni sa Šviedskim ahienctvam mižnarodnaha supracoŭnictva ŭ halinie raźvićcia (SIDA) i na padstavie rekamiendacyj Centra acenki jakaści vyšejšaj adukacyi, pradstaŭlenych u ramkach instytucyjnaj acenki univiersiteta ŭ lutym 2015 hoda. Kiraŭnictva EHU škaduje, što ŭ svajoj spravazdačy Centr nie ŭličyŭ palityčnuju važnaść univiersiteta dla Biełarusi.
Na dumku kiraŭnictva EHU, Centr acenki jakaści vyšejšaj adukacyi taksama nie pryniaŭ da ŭvahi aficyjny adkaz univiersiteta, pradstaŭleny 14 śniežnia 2017 hoda ŭ dačynieńni da papiaredniaj spravazdačy Centra.
