Namieśnik staršyni kamisii pa biaśpiecy i abaronie Pałaty pradstaŭnikoŭ Valeryj Hajdukievič daŭ intervju resursu «Sajuzny naratyŭ — 2050», blizkamu da rusafilskaha asiarodku.

Fota vsr.mil.by

Fota vsr.mil.by

Hajdukievič namalavaŭ karcinu pahroz dla Biełarusi i ŭsiaho śvietu, pryčym davoli kankretna identyfikavaŭšy vytoki zła.

«Čamu amierykancy tak zaŭziata zajmajucca vajennaj śfieraj, pastajanna padtrymlivajuć napružanaść u śviecie? Tamu što heta ŭsio biespakarana, niama žorstkaha adporu i narmalnaha adkazu, tym bolš što jany imknucca dziejničać čužymi rukami. Usie miescy napružańnia, jakija jość siońnia ŭ śviecie, zachoŭvajucca pry padtrymcy i finansavańni ZŠA, — sarvaŭ maski Hajdukievič, abaznačyŭšy taksama i siabroŭ. — Ciapier pajšła novaja chvala pastavak sučasnaj zbroi va Ukrainu. Heta taksama ni da čaho dobraha nie pryviadzie. Budzie adekvatnaja reakcyja «DNR» i «ŁNR», jakija nie buduć siadzieć na miescy i čakać, kali suprać ich buduć prymianiać zbroju. Jany źviernucca da svaich sajuźnikaŭ, kab im taksama dapamahli ŭ pastaŭkach ŭzbrajeńnia».

«Adkul uziałasia «Isłamskaja dziaržava»? Heta niedabitaja ŭ svoj čas irakskaja armija, jakaja rastvaryłasia, źnikła. Ciapier źjavilisia navučanyja ludzi. Ciapier znoŭ amierykancy ich źbirajuć pad svajo kryło i rychtujuć atrady bajevikoŭ, jakija adnaznačna buduć vajavać suprać siryjskaha zakonnaha ŭrada», — jašče raz prajšoŭsia pa amierykancach Hajdukievič.

«U Siryi jany dumali, što majuć samyja lepšyja samaloty, ale, kali sutyknulisia z navat nie apošniaha pakaleńnia rasijskimi źniščalnikami i nie zmahli paŭtaryć fihury, jakija vykonvali rasiejcy, zrazumieli, što nie ŭsio tak biespakarana moža być», — skazaŭ jon.

Da čaho ž rychtavacca Biełarusi?

«Nas u pieršuju čarhu cikavić biaśpieka zachodniaj miažy, pakolki asnoŭny praciŭnik, choć my i nie nazyvajem jaho, ale tym nie mienš majem na ŭvazie, — błok NATA», — skazaŭ deputat.

Hetaj frazaj Hajdukievič abvierh vykazvańni ŭsiaho vyšejšaha kiraŭnictva Biełarusi — i ministra zamiežnych spraŭ Uładzimira Makieja, i kiraŭnika Hienštaba Aleha Biełakonieva, jakija raniej publična zajaŭlali, što pahrozy z boku NATA dla Biełarusi niama.

Valeryj Hajdukievič naradziŭsia ŭ Biahomli. Skončyŭ Razanskuju desantnuju vučelniu, Vajennuju akademiju imia Frunze ŭ Maskvie, Vajennuju akademiju Hienštaba Rasii, a taksama Akademiju kiravańnia pry prezidencie Biełarusi.

Клас
Панылы сорам
Ха-ха
Ого
Сумна
Абуральна