Aktyvist «Ruchu za svabodu» Mikita Siemianienka sioleta sprabavaŭ bałatavacca ŭ miascovyja deputaty na Kuncaŭščynskaj akruzie ŭ Minsku.
Na etapie zboru podpisaŭ, kaža jon, prablem nie ŭźnikła. Ale nie zarehistravali jaho pa inšaj pryčynie.
«Kali pryjšoŭ na finalnaje pasiadžańnie, mnie zajavili, što ja nie budu zarehistravany jak kandydat, tamu što, maŭlaŭ, maju niezadekłaravanuju kvateru, — raskazaŭ «Našaj Nivie» Siemianienka. — Ja adkazaŭ, što było b kruta, kab 22-hadovyja chłopcy ŭ Biełarusi ŭžo mahli mieć svaje kvatery, a nie zdymać. Jany pačali apraŭdvacca, što da ich pytańniaŭ być nie moža, maŭlaŭ, heta kadastr im takuju infarmacyju pradastaviŭ».
Jak vyjaśniłasia, kvatera, jakuju «znajšli» u Siemianienki, naležyć jahonaj maci, ale nijakich pravoŭ na jaje chłopiec nie maje.
«Ja zajechaŭ da mamy, kab pierakanacca, što nijakich niečakanych padarunkaŭ jana mnie nie rabiła. U pryncypie, tak usio i jość: pavodle papieraŭ, maja maci — adzinaja ŭłaśnica pamiaškańnia. My ź joj taksama nosim roznyja proźviščy, ja nie maju navat niejkaj doli», — kaža Siemianienka.
Mikita z maci.
Ciapier Siemianienka źbirajecca ŭziać adpaviednuju vypisku i padać u sud na Nacyjanalnaje kadastravaje ahientcva — budzie patrabavać «adnu bazavuju vieličyniu ŭ fond kandydata».
