Praciahvajecca abmierkavańnie historyi z adličeńniem z BDU druhakurśnicy Instytuta žurnalistyki Hanny Śmilevič (Pachołka).
Dziaŭčyna miesiac tamu ŭznačaliła «Moładź BNF». Na nastupnaj siesii jana raptam nie zdała adrazu try ispyty i budzie adličanaja z VNU. Sama Hanna kaža, što jaje «presujuć» za palityku, vykładčyki nastojvajuć, što pryčyny prablemaŭ u słabych viedach studentki.
Vysłuchaŭšy samu Śmilevič, a taksama vykładčykaŭ, jakija pastavili dziaŭčynie kiepskija adznaki na ekzamienach, «Naša Niva» vyrašyła pahavaryć z adnahrupnikami dziaŭčyny. Adznačym, što bolšaść tych, z kim atrymałasia źviazacca, kateharyčna admoviłasia ad kamientaraŭ.
Jak vyśvietliłasia, z usioj hrupy try zavalenyja ekzamieny i aŭtamatyčnaje adličeńnie atrymała tolki Hanna.
Ale jaje adnahrupnica, jakaja pahadziłasia na razmovu, ličyć, što sprava naŭrad ci źviazanaja z palitykaj.
«My z Hannaj nie blizkija siabroŭki. Ale ja viedaju, jak jana vučycca. Jana nie lepšaja studentka, dakładna. Ale i nie horšaja.
Naviedvalnaść u jaje zvyčajnaja: Hanna prahulvała zaniatki jak i ŭsie, dzieści bolš, dzieści mienš, — kaža studentka. — Dva ispyty jana zdała: dyzajn haziety i anhlijskuju movu.
Dyzajn haziety prymaŭ vielmi łahodny vykładčyk, tam nižej za «6» nichto nie atrymaŭ. Jamu niama sensu kahości valić. Hanna atrymała «6».
Pa anhlijskaj movie jana znoŭ atrymała «6».
«Na ispycie ŭ Niny Fralcovaj («Teoryja žurnalistyki» — Red.) Hanna była adzinaj, chto nie zdaŭ. I ŭsie mocna ździvilisia, bo nie čakali ad takoha vykładčyka pierazdačaŭ».
Ale ž Dziesiukievič («Mova i styl srodkaŭ masavaj kamunikacyi» — Red.) adpraviła na pierazdaču siem čałaviek. I chaj Hanna nie kryŭduje, ale adpravili i razumniejšych za jaje studentaŭ, — vykazałasia dziaŭčyna. — Što tyčycca Taćciany Padalak («Prafiesijnaja etyka» — Red.), to jana vielmi dziŭny vykładčyk. Jaje bolš cikavić naviedvalnaść, čym viedy, jak ja razumieju. To bok niavažna, nakolki ty dobra viedaješ pradmiet — buduć vialikija prablemy, kali student kiepska chadziŭ na zaniatki. Ja liču, što ŭ situacyi z Padalak sprava nie ŭ palitycy. Chutčej za ŭsio, Hanna joj čymści nie spadabałasia: refierat, samaprezientacyja, vusny adkaz… Što zaŭhodna».
Sama Hanna Śmilevič praciahvaje nastojvać, što jaje adličyli za palityku.
«Jak vy sami ličycie, jak ja mahła atrymać takuju adznaku pa CT, robiačy padobnyja elemientarnyja pamyłki? — zadajecca pytańniem Hanna. — Moža, u situacyi vinavataja i nie vyklučna palityka, ale palityka dakładna maje na heta vialiki ŭpłyŭ».
Čytajcie taksama: Jašče adna vykładčyca BDU tłumačyć pravalenyja ekzamieny staršyni «Moładzi BNF»: Hanna napisała «sovpOdajet» i «paraLelno»
Taksama dziaŭčyna apublikavała fotazdymki svajoj zalikovaj knižki z adznakami, prapanujučy paraŭnać letašnija i sioletnija adznaki za ekzamieny.
Druhaja siesija — siaredni bał 6,6. Usie ekzamieny zdadzienyja.
Treciaja siesija — siaredni bał apuściŭsia da 4 bałaŭ. Try ekzamieny niezdadzienyja.
