U historyi z «rabavańniem kvietak» u Viciebsku — novy pavarot. U śniežni kryminalnuju spravu ŭ dačynieńni da žančyny i jaje dački prypynili. Usio musiła abyścisia «administratyŭkaj». Adnak u studzieni hałoŭnaj fihurantcy paviedamili, što pa spravie adnavili papiaredniaje śledstva, pra heta piša TUT.BY.
Bukiet, jaki hierainia historyi chacieła padaryć svajoj mamie. Vakoł hronak rabiny — ściebły taho samaha ačytka, zrezanaha z kłumby. Fota pradstaŭlena Aksanaj.
U liście, jaki prafiesijny fłaryst Aksana (imia pa prośbie žančyny źmieniena) atrymała sa Śledčaha kamiteta, paviedamlajecca, što 4 studzienia namieśnik prakurora horada Viciebska admianiŭ u dačynieńni da jaje i dački pastanovu ab spynieńni kryminalnaha pieraśledu. «Papiaredniaje śledstva adnoŭlena», — havorycca ŭ paviedamleńni.
Nahadajem, 26 kastryčnika 2017 hoda kala doma № 8 na vulicy Miedycynskaj u Viciebsku mama z 15-hadovaj dačkoj sarvali z kłumby 25 kvietak ačytka. Heta zaŭvažyła žycharka pieršaha paviercha, pad voknami jakoj usio adbyvałasia. Žančyna źniała «akt vandalizmu» na kamieru i napisała zajavu ŭ milicyju. Paśla praviedzienaj AUS pravierki materyjał pastupiŭ z prakuratury Viciebska ŭ śledstva. Śledčy kamitet pačaŭ kryminalnuju spravu pa fakcie rabavańnia, ździejśnienaha hrupaj asobaŭ.
Paśla rezanansu ŭ ŚMI vakoł hetaj historyi śledstva spyniłasia — jak vyrašyli ŭ SK, z-za «małaznačnaści» spravy. Pry hetym materyjały pieradali ŭ milicyju, kab pryciahnuć Aksanu i jaje dačku da adkaznaści za administracyjnaje pravaparušeńnie.
— Śledčyja pryniali ŭsie miery pa nivieliravańni kanfliktu. Adnak žančyna ŭ kateharyčnaj formie admoviłasia pryznać svajo pravaparušeńnie i tym bolš pahadžacca z paciarpiełym bokam, ličačy svoj učynak normaj pavodzin, — prakamientavała ŭ śniežni hetuju situacyju aficyjny pradstaŭnik USK pa rehijonie Śviatłana Sacharava.
Jašče raniej Aksana raspaviała, što ŭ tłumačeńni, dadzienym u milicyi, skazała, što «abaviazvajecca hetaj žančynie [jakaja napisała zajavu] pasadzić pa viaśnie kust ačytka. Jaho košt na samaj spravie ad 2,5 da 4 rubloŭ. Adnak žančynie ci nie paviedamili pra namier, ci heta jaje nie zadavoliła».
