Paleantołahi padčas raskopak
Reštki vielizarnaje žyvioły, jakaja žyła ŭ hetym rajonie bolš za 75 miljonaŭ hod tamu, archieołahi znajšli jašče ŭ śniežni 2013 hoda. Čatyry hady paleantołahi z univiersiteta El-Mansura pryśviacili ich vyvučeńniu, i tolki ciapier vyniki daśledavańnia apublikavali ŭ navukovym časopisie Nature Ecology and Evolution.
Dynazaŭr, nazvany ŭ honar univiersiteta Mansurazaŭram, važyŭ 5,5 ton, mieŭ doŭhuju šyju i chvost, pierasoŭvaŭsia na čatyroch łapach i byŭ travajednym, jak i ŭsie tytanazaŭry, da jakich jon adnosicca.
Daśledniki adznačajuć, što škilet Mansurazaŭra źjaŭlajecca adnym z najbolš poŭnych z usich vyjaŭlenych u Afrycy: dobra zachavaŭsia čerap, nižniaja skivica, šyja i chrybietnik, a taksama kaniečnaści.
Rekanstrukcyja škileta
Pavodle acenak navukoŭcaŭ, hety vid dynazaŭraŭ nie padobny na inšych asobin, jakija zasialali ŭ toj pieryjad terytoryju sučasnaj Afryki: reštki identyčnyja zaŭrapodam (jaščaranohim dynazaŭram) krejdavaha pieryjadu, pareštki jakich raniej znachodzili ŭ Jeŭropie i Azii. Heta dazvalaje vykazać zdahadku, što žyvioły nie evalucyjanavali adasoblena, a mihravali pa kantynientach, u tym liku pamiž Paŭnočnaj Afrykaj i Paŭdniovaj Jeŭropaj.
Mansurazaŭr, chutčej za ŭsio, žyŭ na ŭźbiarežžy staražytnaha akijana, jaki raźmiaščaŭsia akurat tam, dzie zaraz pustynia. Tamu hetaja znachodka taksama dazvalaje ŭdakładnić hieahrafiju krejdavaha pieryjadu, adznačajuć daśledčyki.
