Niachaj vas nie pałochaje vyhlad: za hetuju chatku ŭ Zacani prosiać 220 tys. u.a.
8-sotkavyja działki ziamli pad zabudovu ŭ Drazdach razyšlisia za 700 miljonaŭ rubloŭ.
U našaj krainie ŭsio bolšaje kolkaść bahatyroŭ, zdolnych vykłaści sotni tysiačaŭ dalaraŭ za ŭčastak ziamli ŭ dobrym miescy pad Mienskam. Zirniem na vyniki vieraśnioŭskich aŭkcyjonaŭ pa prodažy ziamielnych nadziełaŭ u pryvatnuju ŭłasnaść. Naprykład, prodaž učastkaŭ pad małapaviarchovuju zabudovu ŭ miežach pr.Pieramožcaŭ — prajezdu Drazdy — r.Śvisłač.
Pry startavych koštach ad 180 miljonaŭ rubloŭ placy płoščaj 8—10 sotak razychodziacca za 660-770 miljonaŭ.
Ziamla imkliva daražeje i ŭ vakolicach Miensku.Voźmiem, da prykładu, Zacań. Na adnym z ryełterskich sajtaŭ možna pabačyć zdymki jak ŭžo pabudavanych «pałacaŭ», tak i ŭrosłych u travu chałupaŭ. Ale niachaj vas nia strašyć vyhlad pachilenych barakaŭ: jany kaštujuć 200 i bolej tysiačaŭ dalaraŭ.
U rehijonach ziamielka pakul nie takaja darahaja, jak u stalicy. Tut, vidavočna, usio zaležyć ad miescaznachodžańnia. Tak, u Bieraściejskim rajonie ŭ vioscy Černi ŭ vieraśni ŭčastak płoščaj ŭ 11 sotak nabyli za 27 miljonaŭ, a na kurortnaj Brasłaŭščynie ŭčastki pa 24 sotak pajšli za 70 miljonaŭ.
Na Mahiloŭščynie i Homielščynie samyja darahija ŭčastki z pradadzienych na aŭkcyjonach kaštavali nia bolš za 7 miljonaŭ, a vakoł stalicy samy darahi rajon, naturalna, Mienski – ad 30 da 300 miljonaŭ rubloŭ (Sieńnica) za ŭčastki 10 da 25 sotak. Dalej iduć Dziaržynski i Smalavicki rajony.
Varta adznačyć, što jość u Biełarusi kutki, dzie pad pabudovu domu ŭsio jašče možna nabyć učastak ziamli za śmiešnyja hrošy – jakija 100-150 tysiačaŭ rubloŭ. A byvajuć aŭkcyjony, na jakich startavy košt u vynikovaha adroźnivajecca ŭ dziasiatki razoŭ – prasili za tyja čverć hiektaru 125 tysiačaŭ, a pradali amal za 10 miljonaŭ.
Siamion Piečanko
Fota rc.by
